آراز نیوز

ارگان خبری تشکیلات مقاومت ملی آزربایجان

دیرنیش
جمعه ۹ام آبان ۱۳۹۹
آخرین عناوین
شما اینجا هستید: / بیانیه / آزربایجان دموکرات فیرقه‌سی-نین قورولماسینین ۷۵-جی ایلدؤنومو موناسیبتیله آزربایجان میللی حرکاتینین سیاسی و آراشدیرما قروپلارینین اورتاق بیاناتی

آزربایجان دموکرات فیرقه‌سی-نین قورولماسینین ۷۵-جی ایلدؤنومو موناسیبتیله آزربایجان میللی حرکاتینین سیاسی و آراشدیرما قروپلارینین اورتاق بیاناتی

آزربایجان دموکرات فیرقه‌سی-نین قورولماسینین ۷۵-جی ایلدؤنومو موناسیبتیله آزربایجان میللی حرکاتینین سیاسی و آراشدیرما قروپلارینین اورتاق بیاناتی
29 آگوست 2020 - 16:13
کد خبر: ۵۶۱۳۱
تحریریه آرازنیوز

آزربایجان تورک میللتی!
مئدیا امکداشلاری!
دئموکراتیک و آزادلیق سئوه‌ن قوه‌لر!

۱۹۴۵ – جی ایل سئنتیابر آیینین ۳-ده آزربایجان تورک میللتینین فاشیست و مورتجع شاه رئژیمینه قارشی دموکراتیک و مترقی موباریزه‌سینین تاریخین‌ده، آجیناجاقلی یاخین شرق بؤلگه‌سینده «سید جعفر پیشه‌وری» اؤندرلیینده و «آزربایجان دموکرات فیرقه‌سی» اؤنجوللویونده شانلی بیر صحیفه کیمی آزربایجان‌دا میللی و دئموکراتیک حکومتین اساسی قویولدو.

مشروطه اینقیلابینین مترقی ارثی، فاشیست پهلوی رژیمی و دینی گئریچیلیگی اتفاقی نتیجه‌سینده محو ائدیلدیکدن سونرا، پهلوی دیکتاتوراسی، دینی مورتجع دسته‌لرین دسته‌یی ایله سوسیال صینیفلره قارشی ظلم ائتمه‌یه باشلامیشدی. همین وضعیتی موشاهیده ائد‌ن آزربایجان ضیالیلاری و آزادیخواه مابریزلری بیر داها معاصر جمعیت قورماق و اینسان حقوقو و آزادلیقلاری مدافعه ائتمک اوغروندا بیرلیک و همرای‌لیکله ۳ سئنتیابر ۱۹۴۵-جی ایل تاریخینده “بوتون سوسیال صینیفلرین اینسان حقوقلاری”-نا دقت یئتیره‌رک او دؤورون ان مترقی موباریزه نیظامنامه‌لریندن بیرینی یازدیلار.

تأسف کی، ۳ سئنتیابر ۱۹۴۵-جی ایل تاریخلی ۱۲ مادده‌لیک نیظامنامه اساسیندا قورولان ایران‌داکی بوتون مظلوم میللتلر آراسیندا آزادلیق اوچون اومید یارادان تبریزده‌کی آزربایجان میللی حکومتی، ایشغالچی پهلوی شاه اوردوسو طرفیندن دئوریله‌رک آزربایجان‌دا فیلیزلنه‌ن دئموکراتییا فیدانینی محو ائتدی. آزربایجان تورک موباریزلرینین قیرغینیندان، اعدام ائدیلمه‌سین‌دن و دئپورتاسییاسیندان سونرا پهلوی ظولمو و فاشیزمین قارا بولودو یئنی‌دن بیر داها آزربایجان‌ین اوزرینه چکیلدی.

۱۲ مادده‌لیک نیظامنامه‌نین حاضرلانماسیندان ۷۵ ایل سونرا، آزربایجان تورک میللتی، فاشیست “پهلوی” رئژیمینین سوقوطوندان سونرا دا، ظلم و فاشیزمی قیرماق، دئموکراتییا و اؤز موقددراتینی تعین ائتمه حقوقونا نائیل اولماق اوچون بیر چوخ ائنیشلی یوخوشلو یوللاردان کئچدی. اوولکی سیستئمی داوام ائتدیره‌ن آوتوریتار و فاشیست “ایسلام رئسپوبلیکاسی” سیستئمینین آرادان قالدیریلماسی اوغروندا آزربایجان اؤولادلارینین فداکارلیغی و موباریزه‌سی هله ده داوام ائدیر.

بو گون جنوبی آزربایجان میللی حرکاتی ۳ سئنتیابر ۱۹۴۵-جی ایلده باشلادیلمیش حرکاتین تاریخی واریثی اولاراق دئموکراتییا، اؤز موقددراتینی تعین ائتمه حقوقو، اینسان آزادلیغی و مئهریبان قونشولوق و ایران‌داکی مظلوم خالقلارلا بیرلیک طلب ائتمکله موباریزه‌لرینی داوام ائتدیریر. ایران ایسلام رئسپوبلیکاسینین رئژیمی، پهلوی رئژیمی کیمی، آزربایجان تورکلرینین اینسان و میللی حاقلارینی موختلیف فاشیست یوللارلا باسدیرسا دا، ” میللی اویانیش و مقاومت آزربایجان یاخشی گلجه‌یینه دوغرو” داوام ائدیر.

بعضیلری «موخالیفت» آدی و دئموکراتییا شوعاری ایله ایرانین گله‌جه‌یینی “مظلوم میللتلرین قیوملاری” اولاراق تک باشینا تعیین ائتمه‌یه چالیشماق و پهلوی رئژیمینین فاشیست حکومتینی تمیز چیخارماقلا مشغولدورلار. بو قروپ هله ده مظلوم خالقلارین طلبلرینی یئرینه یئتیره بیلمیر، معاصرلیک چاغیندا فارسدیللی مئدیا و اینسان حاقلاری فعاللاری خبرلرینی، اؤز دونوق و فاشیست فیکیرلری اوزوندن ایسلام رئسپوبلیکاسی طرفیندن مظلوم میللتلرین رئپرئسسییا و اینسان حاقلارینین پوزونتولارینی بویکوت ائدیرلر.

مظلوم میللتلرین آزادلیلارینی و اینسان حاقلارینی بوغماقدا و رئپرئسسییا ائتمکده قانلی کئچمیشه صاحب اولان پهلوی و ایسلام رئسپوبلیکاسینین مورتجع و فاشیست رئژیملرینین زامانیندا، مرکزیتچی مونارشیست، سولچو و ساغچی موخالیف قروپلار هله ده مظلوم خالقلارین میللی حقوقلارینا قارشی یاناشما طرزلرینی دییشمیر و کئچمیشلرینی تنقید ائتمکدن یایینیرلار.

ایران‌ین گرگین و بحرانلی داخیلی وضعیتینی نظره آلاراق، همچینین فاشیست و دیکتاتورا رئژیملرینین گئج ویا تئز سونو گلدیینه ایناناراق، مظلوم خالقلارین اؤز موقددراتینی تعیین ائتمه ایستیقامتینده ایره‌لی‌له‌دیی کیمی، آزربایجان میللی حرکاتینین سیاسی قروپلاری اولاراق بیرلیک، همرای‌لیک و دئموکراتییا روحونا و معاصر «۱۲ مادده‌لیک نیطامنامه»-نه سؤیکه‌نیب، اعلان ائدیریک کی، آزربایجان تورکلرینین میللی تالعینی تعیین ائتمک حاقینی الده ائتمک اوچون موباریزه آپارماقدا ایسرارلیییق.

بیز، آزربایجان تورک میللتینین سیاسی قوه‌سی اولان آزربایجان میللی حرکاتینین سیاسی قروپلاری اولاراق، ۳ سئنتیابرین ۷۵-جی ایلدؤنومونده بیلدیریریک کی، آزربایجان تورک میللتی اؤز تالعینی تعیین ائتمک اوچون “سیاسی قییوم”-آ احتیاجی یوخدور و آزربایجان تورک میللتی و سیاسی قروپلاری تام سیاسی یئتیشکین دورومدا دئموکراتیک اصوللار و قانونی اؤزونومودافیه حقوقونو سئچه‌رک میللی موقددراتینی تعین ائتمه حقوقونو الده ائتمه اوغروندا موباریزه آپارماغی سئچمیشدیر.

آزربایجانین اراضی بوتؤولویو و میللی و رئگیونال ماراقلاری بیزیم قیرمیزی خطیمیزدیر و “۳ سئنتیابر ۱۳۴۵-جو ایل تاریخلی مترقی نیظامنامه” آزربایجان‌دا قانونی و میللی حکومتین قورولماسینا سبب اولدوغو کیمی، آزربایجان سیاسی قروپلاری آراسینداکی مؤوجود بیرلیک و یاخینلاشمانین ظلم و فاشیزمین آرادان قالدیریلماسیندا و آزربایجان تورک میللتینین موستملکه‌چیلیک قانداللاریندان آزاد ائدیلمه‌سینده چوخ واجیب بیر آددیم اولدوغونو دوشونوروک.

امینیک کی، ایسلام رئسپوبلیکاسینین گئریچی دیکتاتورلاری، فاشیستلری و مرکزیتچی غیری-دئموکراتیک موخالیفت میللی حرکات تشکیلاتلارینین بیرلیینه و همرای‌لییندن چوخ عصب‌لنیر، لاکین صاباح آزاد و دئموکراتیک بیر آزربایجان قورماق و میللی تالعیمیزی تعیین ائتمک اوچون بیرلیکده چالیشماغی سئچیریک.

آزربایجان مرکز پارتییاسی
آزربایجان سیاسی قورولوشلارینین امکداشلیق پلاتفورماسی (آزوح – دیرنیش – گادپ)
بوتؤو آزربایجان اوجاقلاری (باو)
تبریز آراشدیرمالاری اینستیتوتو
۲۹/۰۸/۲۰۲۰

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر