آراز نیوزا چاتان راپورلارا گؤره، شَنبه ۵ مهر گونو ده تبریزین بعضی بؤلگهلرینده الکتریک پلان اوزره کَسیلیب. حالبوکی انرژی باخانلیغی و توانیر مسئوللاری داها اؤنجه یایداکی اَن یوکسک مصرف دؤنمی کئچدیکدن سونرا برق تأمیناتی شرایطینین یاخشیلاشاجاغینی و محدودیتلرین آزالاجاغینی دئمیشدیلر.
یئرلی راپورلار بعضی بؤلگهلرده کسینتی برنامهسینین گؤزهچارپان بیر دَییشیکلیک اولمادان داوام ائتدیگینی گؤستریر. ایستی دؤنمین بیتمهسی هله ده پلانلی الکتریک کَسیلمهلرینین دایانماسینا گتیریب چیخارماییب.
وطنداشلار آیلاردیر کسینتی و بونون گونلوک یاشاملا ایش یئرلرینه یاراتدیغی پروبلملرله اوزلشیرلر. پاییزدا دا الکتریک کَسیلمهلرینین داوام ائتمهسی، مسئوللارین وعدهلری ایله برق شبکهسینین گرچک دورومو آراسیندا فاصلهنی بیر داها اورتایا قویوب.
