اسلامی شورا مجلسینین نمایندهسی امیرحسین ثابتی، عباس عراقچینی «اؤز باشینا» آدلاندیریب و آمریکا حوکومتی ایله باغلی تماسلارین آرخاسیجا ایران جمهوریتینین دیش ایشلر باخانینین استیضاح طرحینی مجلسین سیستمینه قئیده آلدیردیغینی آچیقلاییب.
ثابتی مجلس باشقانینا یازدیغی مکتوبدا ادعا ائدیب عراقچینین آمریکا طرفی ایله تماسی مجتبی خامنهاینین «ایجازهسی اولمادان» باش توتوب. او، دیش ایشلر باخانینین سون آیلارداکی مؤوقعینین، اؤز تعبیرینجه، «دونیا نفت قیمتینین دوشمهسینه» و «دوشمنه نفس آلما فرصتی وئریلمهسینه» سبب اولدوغونو اؤنه سوروب.
بو مجلس نمایندهسی دیش ایشلر باخانلیغینین اقتصادی دیپلوماسی ساحهسیندهکی فعالیتینی ده «گوجسوز» آدلاندیریب و ایران جمهوریتینین دیش سیاستینین، اؤز باخیشینا گؤره، «فایداسیز، حتی چوخ ضررلی» اولان آمریکا ایله مذاکرهلره محدود قالدیغینی دئییب.
بو آچیقلاما دونالد ترامپین، استیو ویتکاف و جرد کوشنرین بیرلشمیش میللتلر باش مجمعینین حاشیهسینده ایران جمهوریتی ایله باغلی واسطهچیلرله «چوخ وئریملی» گؤروشلر کئچیردیگینی دئمهسیندن سونرا وئریلیب. وئریلن بیلگیلره گؤره، تماسلارین بیرباشا ایران مسئوللاری ایله اولدوغو، یوخسا یالنیز واسطهچیلر آراجيلیغی ایله آپاریلدیغی حاققیندا فرقلی روایتلر وار.
