ایران جمهورباشقانی مسعود پزشکیان، چیخیشیندا ساواشین سونا ائردیریلمهسینی ایستهییب و عینی زاماندا باهالیق و ساواشین اقتصادی سونوجلاری حاققیندا دانیشان تنقیدچیلری هدف آلیب.
آراز نیوزون ایسنادان نقل ائتدیگینه گؤره، پزشکیان «ساواش بیر نوقطهده سونا چاتمالیدیر» دئییب و ایران جمهوریتینین ایندی، اونون سؤزلرینه گؤره، «گوج و عزت» ایچینده اولدوغو و دونیانین اونون «ظفرینی» قبول ائتدیگی بیر زاماندا ساواشی بیتیرمهنین داها اویغون اولدوغونو اؤنه سوروب.
او دانیشیغینین باشقا بیر بؤلومونده تنقید ائدنلری «مئیدانین دیشیندا اوتوران» و حوکومتین شرطلریندن خبرسیز دانیشان شخصلر اولاراق توصیف ائدیب و «سونرا دا باهالیقدان دانیشیرلار» دئییب.
بو سؤزلر، قیمتلرین یوکسلدیگی، آلـیم گوجونون آزالدیغی و عاییلهلرین گئچیم اوزریندهکی باسقینین گئدرک آرتدیغی بیر دؤنمده سؤیلنیب؛ بو مسئلهلر ایران جمهوریتینین ان اؤنملی ایچ چاتیشمالاریندان بیرینه چئوریلیب.
