بریتانیا دنیز تیجارتی عملیاتلاری تشکیلاتی، هورموز بوغازیندا بیر یوک گمیسینه «نامعلوم بیر مرمی» دَیدیگینی خبر وئردی؛ بو حادثه واشینگتون و تئهران آراسینداکی موذاکرهلرله باغلی بلیرسیزلیگین داوام ائتدیگی بیر واختدا باش وئریب.
آراز نیوزون خبرینه گؤره، بریتانیا دنیز تیجارتی عملیاتلاری تشکیلاتی بیلدیریب کی، بو گمی عومانین خصب شهرینین شیمال-شرقینده تخمینا ۲۰ دنیز میلی مسافهده نامعلوم بیر مرمینین هدفی اولوب. ایندییه قدر جانی تلفات یا احتمالی زیانلار بارهده خبر یاییملانماییب و مسئول رسمیلر بو حادثهنی آراشدیریرلار.
بو حادثه، دونالد ترامپین جومهوری اسلامی ایله دانیشیقلارین باشلادیغینی سؤیلهدیگی، آنجاق تئهرانین هر هانسی موذاکرهنی رد ائتدیگی بیر واختدا باش وئریب.
بو بلیرسیزلیگین داوامی، هورموز بوغازیندا گمیلره ائدیلن سون حوجوملارلا عئینی زاماندا، دونیانین ان اؤنملی انرژی داشیما مسیرلریندن بیرینین تهلوکهسیزلیگی بارهده نیگرانلیقلاری آرتیریب.
