علی خامنهاینین دفن مراسیمی ایران تاریخینده بیر دؤورون باشا چاتماسی و یئنی بیر دؤورون باشلانماسینین سمبولیک آنیدیر.
یقین کی، خامنهاینین گرچگه چئوریلن تک اؤنگؤروسو (پیشبینلیگی) اونون واختیله دئدیگی بو سؤز ایدی: «منیم رهبر اولدوغوم جمعیتین حالینا قان آغلاماق گرکدیر.»
آردی
او ایللرله امثالسیز بیر انجماد و عناد ایله تکجه آزادلیغین بوتون تظاهرلرینه و چاغداش بشری دگرلره قارشی چیخمادی؛ عئینی زاماندا آزادلیق و اینسانی یاشام ایستهین وطنداشلاری توپلو شکلینده قتل ائتدی. اؤلکهنی اینکیشاف زیروهلرینه چاتدیرماقدان، داخیلی امنیّتدن، «نه موذاکیره، نه ده ساواش»دان دانیشدی، آنجاق سوندا اؤلکه حسابینا آغیر بدللرله قوردوغو بوتون سنگرلری بیر-بیر ایتیردی، موذاکیره ائلهدی و ساواشین ایلک آنلاریندا اؤزو و یاخین اکیبی اؤلدورولدو.
نتیجهده اقتصادی و علمی اینکیشافین، آزادلیقلار و رفاهین هئچ بیر اثرینین اولمادیغی بیر ایران اورتادا قالدی. بؤلگهنی استقرارسیزلیغا سوروکلهین، قونشولارینا داواملی موشک آتان و تهدید ائدن و هر کسین داها آز ضرر گؤرمک اوچون بیر دیل تاپیب دانیشماغا چالیشدیغی شرور بیر رژیم، ائلهجه ده اقتصادی و سیاسی بینالخلق مۆناسیبتلرین هامیسیندان تجرید اولونموش بیر اؤلکه قالدی اورتادا.
خامنهاینین دفن مراسیمی اونون حیاتینین اَن عیبرتلیک آنیدیر.
ایللرله اؤز خالقینا قارشی ساواش آپاران دیکتاتور، باش وئرمهیهجگینی ایدعا ائتدیگی خاریجی هۆجومون ایلک آنلاریندا اؤلدورولدو. اونون دفنی معنالی بیر گئجیکمه ایله کئچیریلدی. دفن مراسیمینده هئچ بیر بیرینجی درجه خاریجی لیدر ایشتیراک ائتمهدی. کودتا یولو ایله یئرینه گتیریلن اوغلو هله ده غایبدیر و اورتالیقدا گؤرونمور. حتی عایله عضولری بئله اونون دفن مراسیمینده اشتراک ائده بیلمهدیلر.
رژیم دفن مراسیمینده اشتراک ائدن مینلرله اینسانی گؤسترهرک اونون خالق آراسیندا دایاغی اولدوغونو ایدعا ائتمگه چالیشیر. آنجاق بو اینسانلار ایرانین ۹۰ میلیونلوق اهالیسینین یوزده نئچهسینی تشکیل ائدیر؟ استالین و صدام کیمی دیکتاتورلار دا بئله ازدحاملار توپلایا بیلمیشدیلر، لاکین تاریخ محکمهسینین حؤکموندن یاخا قورتارا بیلمهدیلر.
خامنهای سؤزون تام معناسیندا ایرانی تجرید ائله دی و اؤزو ده تجرید ایچینده اؤلدو. اونون ایرانا قویموش اولدوغو میراث گؤز یاشی و قان لکهسیندن باشقا بیر شئی دئییل.
علی خامنهاینین ایرانا حاکمیتی دؤورو ده اونون دفن مراسیمی کیمی آجیناجاقلی، روحسوز و مضمون سوز اولدو.
آما هر نه ایدیسه، آرتیق باشا چاتدی.
ایندی اورتادا ۹۰ میلیون انسان و علی خامنهاینین قویوب گئتدیگی شوم میراث قالیب.
بو قارا میراثی تاریخین زیبیللیگینه آتماق و یئنی بیر گلهجک قورماق اوچون چالیشماق لازیمدیر
مجید جوادی آراز
