آذربایجان میللی حرکتی فعالی علی بابایی، ۱۲ گون تام مکالمه و ملاقات قاداغاسیندان سونرا نهایت تبریز مرکزی زیندانیندان حیات یولداشی ایله تلفنلا دانیشدی و بو دویغولو گؤروشده آذربایجانین تانینمیش سیاسی محبوسو یوروش مهرعلیبیگلینین دیرنیش روحلو بیر شعرینی اونون اوچون اوخودو.
آراز نیوزون خبرینه گؤره، علی بابایینین حیات یولداشی الهام جوانشیر اؤز اینستاگرام استوریسینده بو دانیشیقدان خبر وئریب. او یازدی، ۱۲ گون خبرسیزلیکدن سونرا حیات یولداشینین سسینی ائشیدیب.
اونون سؤزلرینه گؤره، بابایی بو تماسدا یوروش مهرعلیبیگلینین بیر شعرینی حیات یولداشی اوچون اوخویوب:
یالنیز سنی دوشونورم، بورادا هر شئی اؤنمسیزدیر. دووارلارین اوجالماسی، قاپیلارین باغلانماسی، قورخوتمالار، دیندیرمهلر… اؤنمسیزدیر منیم اوچون. موتلویام سنینله بورادا. اونو مندن آلا بیلمزلر؛ نه قانداللار، نه قامچیلار.
الهام جوانشیر یازدی، بو سؤزلر اونون بوغازیندا دویونلندی و داها هئچ نه دئیه بیلمهدی؛ سادهجه سکوت و گؤز یاشی قالدی.
علی بابایی بوندان قاباق دا سیاسی محبوسلاری مامورلارین شیددتینه قارشی ساووندوغونا گؤره دؤیولموش و انفرادی حوجرهیه کؤچورولموشدو. او، سیاسی محبوسلارلا داورانیشا اعتراض اولاراق بیر سیرا همبندلری ایله بیرلیکده آجلیق آکسییاسینا (اعتصاب غذا) اَل آتمیشدی.
