آراز نیوزون وئردیگی بیلگیلره گؤره، بیرلشمیش میلتلر تشکیلاتینین باش مجلیسی ۲۰۰۰-جی ایلده چیخاردیغی اؤزل بیر قطعنامه ایله ایونون ۲۰-سینی دونیا قاچقینلار گونو کیمی تانیییب. بو گونون آماجی، ساواش و زورلوق اوزوندن یوردلارینی ترک ائتمگه مجبور اولان اینسانلارین چتینلیکلرینه دیقت چکمک و اولوسلارآراسی همرایلیق یاراتماقدیر.
بیرلشمیش میلتلر تشکیلاتینین راپورونا گؤره، قاچقینلارین دورومونا دایر ۱۹۵۱-جی ایل کنوانسیونونون قبولوندان ۷۵ ایل کئچمهسینه باخمایاراق، بو عومومی مسئولیت هله ده تام یئرینه یئتیریلمهییب.
بوگون دونیا جغرافیاسیندا سودان، کونقو، اوکراین، افغانیستان، سوریه و میانمار کیمی اؤلکهلردهکی بحرانلار اوزوندن ۱۱۷ میلیوندان چوخ اینسان قاچقین و مجبوری کؤچکون دورومونا دوشوب.
قاچقینلارین قورونماسی یالنیز اینسانی بیر آددیم دئییل، بلکه بؤلگهسل ثبات و باریشین دا اَن اؤنملی شرطلریندن بیریدیر.
بو اینسانلارین قورخوسوز یاشاماسی، اؤزلرینه یئنی حیات قورماسی و شرایط یاراندیقدا کؤنوللو و لیاقتلی شکیلده اؤز ائولرینه قاییدا بیلمهسی اوچون دونیانین جیددی دستگینه احتیاج واردیر.
