İslam İnqilabı Keşikçiləri Korpusunun (SEPAH) Hərbi Dəniz Qüvvələri bu gün axşam Hörmüz boğazının cənub marşrutunda bir supertankerin minaya toxunduğunu açıqlayıb. SEPAH-ın bildirdiyinə görə, tanker güclü partlayışdan sonra alışıb və hələ də yanır. Bu, bu günün ilk saatlarından bəri boğazda hadisəyə məruz qalan dördüncü neft tankeridir.
SEPAH iddia edir ki, 2 milyon bareldən çox xam neft daşıyan tanker boğazın cənubundakı «icazəsiz marşrut»la çıxmaq niyyətində olub. Qurumun iddiasına görə, tankerin ekipajı SEPAH-ın bu marşrutdan keçməmək barədə radio xəbərdarlıqlarına məhəl qoymayıb. SEPAH-ın Hərbi Dəniz Qüvvələri yaydığı bəyanatda bu hadisələrə görə məsuliyyəti ABŞ-ın üzərinə qoyub.
