ABŞ Dövlət Departamenti Səudiyyə Ərəbistanına 24,3 milyard dollar dəyərində 48 ədəd qabaqcıl F-35 qırıcı təyyarəsinin satışına razılıq verib. Yekunlaşdığı təqdirdə bu, Riyadın hava gücünü xeyli artıracaq.
ABŞ Dövlət Departamentinin açıqlamasına görə, sövdələşmə Səudiyyə Ərəbistanının çəkindirmə potensialını, hava müdafiəsini və hava-hava, hava-yer əməliyyatlarındakı əməliyyat qabiliyyətini gücləndirmək məqsədilə planlaşdırılıb.
Səudiyyə Ərəbistanının Vaşinqtondakı səfirliyi bu qərarı razılıqla qarşılayaraq, onu iki ölkə arasında təhlükəsizlik əməkdaşlığının möhkəmləndirilməsinin göstəricisi kimi qiymətləndirib.
Sazişin indi ABŞ Konqresindən qanuni prosedurlardan keçməsi lazımdır. Konqresdə İsrailin hərbi üstünlüyünün qorunub saxlanılması, eləcə də Çinin F-35-in həssas texnologiyasına çıxış əldə etmə ehtimalı ilə bağlı narahatlıqlar dilə gətirilib.
Saziş yekunlaşarsa, Səudiyyə Ərəbistanı İsraildən sonra regionda bu beşinci nəsil qırıcı təyyarəyə malik olan az sayda ölkədən birinə çevriləcək.
