İsraildə məhkəmə bu ölkənin vətəndaşı Aleksandr Qranovskini İran rejiminin agenti üçün fəaliyyət göstərmək, casusluq, sabotaj və əmlaka od vurmaq ittihamları ilə 13 il 6 ay həbs cəzasına məhkum edib.
Lod şəhərindəki mərkəzi məhkəmə çərşənbə günü Qranovskini 2024-cü ilin sonlarında İran rejiminin agenti üçün tapşırıqlar yerinə yetirdiyinə görə təqsirli bilib. İsrail prokurorluğu bu hökmü İran rejiminin agentləri üçün fəaliyyət göstərən israilli vətəndaşlarla bağlı işlərdə indiyədək çıxarılan ən ağır cəza kimi açıqlayıb.
İttihamnaməyə əsasən, o, Telegram vasitəsilə İran rejiminin agenti ilə əlaqədə olub, elektrik istehsalı obyektlərinin və Benni Qantsın yaşayış yerinin görüntülərini çəkib, həmçinin 9 avtomobili yandırıb. Bildirilir ki, bu tapşırıqlara görə o, bir neçə min dollar məbləğində pul alıb.
