ABŞ vitse-prezidenti Ceydi Vens açıqlayıb ki, ABŞ ilə İran arasındakı münaqişə önümüzdəki bir-iki ay ərzində "tamamilə fərqli bir mərhələyə" keçə bilər.
Vens "New York Post" qəzetinə müsahibəsində bildirib ki, ABŞ administrasiyası aralıq seçkilərdən sonra müharibə şəraitinin dəyişməsini gözləyir.
Eyni zamanda, Vens vurğulayıb ki, hər hansı hərbi əməliyyatın başlanması və ya bitirilməsi ilə bağlı qərar ali baş komandan qismində ABŞ prezidentinin səlahiyyətindədir.
ABŞ vitse-prezidenti həmçinin iddia edib ki, İran Hörmüz boğazı üzərində tam nəzarəti saxlamaqda hələ də çətinliklərlə üzləşir. Onun sözlərinə görə, dəniz nəqliyyatının artmasına baxmayaraq, bu strateji su yolunda gəmilərin hərəkət səviyyəsi hələ normal vəziyyətə qayıtmayıb və müharibədən əvvəlki səviyyənin 50 faizdən çoxuna çatıb.
Vens əlavə edib ki, İran qüvvələri müxtəlif hallarda hələ də ticarət gəmilərini hədəf alır, lakin bu hücumların əksəriyyəti uğurlu olmayıb.
