Livanın Daxili İşlər naziri Əhməd əl-Həccar bildirib ki, Beyrut ABŞ-ın vasitəçiliyi ilə İsrail ilə birbaşa danışıqlar variantına sadiqdir. Bildirilir ki, bu danışıqların məqsədi İsrail qüvvələrinin Livanın cənubundan çıxarılması, Livan ordusunun həmin ərazidə yerləşdirilməsi və sakinlərin öz kəndlərinə qayıtmasıdır.
Əl-Həccar "əl-Ərəbiyyə" telekanalına müsahibəsində bölgədəki gərgin proseslərin Livana təsir göstərdiyini deyib və əlavə edib: "Biz İsraillə danışıqlar üçün xüsusi bir yol tutmaq qərarına gəlmişik".
Bu açıqlamalar Livan Daxili İşlər nazirinin Pakistana rəsmi səfəri zamanı səslənib. Səfər çərçivəsində nazir bu ölkənin yüksək vəzifəli şəxsləri ilə bölgədəki proseslər, məlumat mübadiləsi, narkotiklə mübarizə və terrorizmə qarşı mübarizə mövzularında danışıqlar aparıb. Livan və Pakistan həmçinin məhbusların mübadiləsinə dair anlaşma memorandumu imzalayıb.
