Səudiyyə Ərəbistanı və İraq rəsmiləri bildirir ki, Yəmənin husiləri İran rejiminin dəstəklədiyi silahlı qrupların İraq ərazisindən Səudiyyə Ərəbistanının neft obyektlərinə qarşı həyata keçirdiyi pilotsuz uçuş aparatı hücumlarının planlaşdırılmasında və icrasında iştirak edib. Bu, Tehranın regiondaki vəkil qrupları şəbəkəsi arasında koordinasiya səviyyəsinin yüksəldiyindən xəbər verir.
Euronews Associated Press-in hesabatına istinadən yazır ki, iki səudiyyəli rəsmi və İraqın yüksək vəzifəli təhlükəsizlik məmuru təhlükəsizlik məlumatlarına əsaslanaraq husi nümayəndələrinin İraq silahlı qruplarının əməliyyat mərkəzində olmasını təsdiqləyib. Bu mənbələrə görə, husilər çoxlu sayda pilotsuz uçuş aparatından istifadə olunan iki günlük hücumun hazırlanmasında və icrasında iştirak edib.
Bu hücumlardan sonra Səudiyyə Ərəbistanı və ABŞ iyul ayında İraqda İran rejiminin dəstəklədiyi silahlı qrupların mövqelərini bombalayıb. Hesabata görə, bu hücumlarda ən azı 20 İraq qüvvəsi, altı İran müşaviri və bir husi rəsmisi öldürülüb. ABŞ-ın bir hərbi məmuru da bildirib ki, Vaşinqton husilərin İraqda olması və onların ABŞ-ın müttəfiqlərinə, o cümlədən Səudiyyə Ərəbistanına qarşı sərhədaşırı hücumlar həyata keçirmək qabiliyyətindən narahatdır.
Eyni zamanda, husilər son həftələrdə Qırmızı dənizdə Səudiyyə Ərəbistanına qarşı təzyiqi artırıb. Açıqlanan məlumatlara görə, onlar iyulun sonundan etibarən Səudiyyə Ərəbistanının neft obyektlərinə və tankerlərinə qarşı 12-dən çox hücum həyata keçirib, hücumların ən son dalğasında isə Səudiyyə Ərəbistanının cənubunda 70-dən çox adam yaralanıb. Bu təhdidlər Riyadı tankerlərin izləmə siqnallarını söndürməklə neft ixracının bir hissəsini həyata keçirməyə vadar edib.
Hesabat həmçinin göstərir ki, Hörmüz boğazından keçid marşrutunun məhdudlaşdırılmasından sonra Səudiyyə Ərəbistanı Qırmızı dəniz, Süveyş kanalı və Misirin Sumed neft boru xətti vasitəsilə neft daşınmasını kəskin şəkildə artırıb. Bu həcm iyunda gündə təxminən 650 min barreldən avqust ayında gündə 1,9 milyon barreldən çoxa çatıb.
Təhlilçilər bildirir ki, husilər və İraq silahlı qrupları arasında əməkdaşlığın artması İran rejiminin Səudiyyə Ərəbistanına və regiondaki digər ABŞ müttəfiqlərinə eyni zamanda təzyiq göstərmək strategiyasının bir hissəsidir. Bu, regional münaqişələrə yeni cəbhələr əlavə edə biləcək bir model hesab olunur.
