ABŞ prezidenti Donald Tramp "Truth Social" sosial şəbəkəsində mübahisə doğuran bir şəkil yayaraq, Hörmüz boğazının "ABŞ ərazisinə" çevrilməsi barədə iddiasını bir daha önə çəkib.
Trampın yaydığı şəkildə Hörmüz boğazının xəritəsinin üstündə iri hərflərlə "Amerika Birləşmiş Ştatlarının yeni ərazisi" ifadəsi yazılıb, bu strateji su yolunun İranla yanaşı yerləşən mövqeyi göstərilib.
Bu addım Trampın bir neçə gün əvvəl "İranın məğlubiyyətindən" sonra Hörmüz boğazını ABŞ ərazisinə çevirəcəyini açıqlamasından sonra atılıb. O, həmçinin ABŞ-ın bu su yolu üzərində "tam nəzarətə" sahib olduğunu və Vaşinqtonun dəniz mühasirəsinin hansı gəmilərin keçidinə icazə veriləcəyini müəyyən etdiyini iddia edib.
Tehran bu iddiaları rədd edib, İran rejiminin məmurları isə Hörmüz boğazı üzərində öz nəzarətlərini davam etdirdiklərini vurğulayırlar. Bu su yolunun statusunun müəyyən edilməsi üzrə danışıqların dalana dirəndiyi bir şəraitdə, Trampın bu xəritəni yayması dünyanın ən mühüm enerji daşınma marşrutlarından birinə nəzarət uğrunda mübarizəni bir daha kəskinləşdirib.
