Kalorinin deyil, proteinin azaldılması daha uzun və sağlam ömür üçün daha sadə yol ola bilər. Cell Press Blue jurnalında dərc olunan yeni elmi icmal 350-dən çox tədqiqatı bir araya gətirib. Əsas nəticə aydındır: az kalorili pəhrizin eyni metabolik faydaları ac qalmadan da əldə edilir.
Məsələnin açarı FGF21 adlı hormondur. Protein azaldıqda bu hormonun səviyyəsi yüksəlir. Heyvanlar üzərində aparılan tədqiqatlarda məhz bu artım iltihabı azaldıb və qan şəkərinin daha yaxşı nəzarətdə saxlanmasına səbəb olub. Tədqiqatçılar metionin, izolösin və valin adlı üç amin turşusunu qocalma proseslərinə bağlayıblar.
Vİskonsin-Medison Universitetindən Dadli Leminq tədqiqatın məsul müəllifi kimi bildirib ki, proteinin əzələ qurulmasında faydası fiziki aktiv insanlar üçün tamamilə aydındır. Lakin onun sözlərinə görə, insanların əksəriyyəti az hərəkətlidir və ehtiyacından çox protein qəbul edir. Tədqiqatçılar xəbərdarlıq ediblər ki, bu nəticə az protein qəbulu tövsiyəsi demək deyil; idmançılar, hamilə qadınlar və yaşlılar hələ də yüksək protein qəbuluna ehtiyac duyurlar.
