Ermənistanın baş naziri Nikol Paşinyan yeni parlamentin ilk iclası ilə eyni vaxtda hökumətin istefasını ölkənin prezidentinə təqdim edib. Vahaqn Xaçaturyan da istefanı qəbul edib.
Bu addım Paşinyanın siyasi fəaliyyətdən çəkilməsi anlamına gəlmir. Ermənistan Konstitusiyasının 158-ci maddəsinə əsasən, hökumət yeni seçilmiş parlamentin ilk iclası günü istefa verməyə borcludur, kabinet üzvləri isə yeni hökumət qurulana qədər öz vəzifələrini yerinə yetirməyə davam edirlər.
Paşinyanın rəhbərlik etdiyi "Vətəndaş müqaviləsi" partiyası 7 iyun seçkilərində parlamentdəki 105 mandatdan 64-nü qazanaraq əksəriyyəti əldə edib. Konstitusiyaya əsasən, baş nazir vəzifəsinə parlament əksəriyyəti tərəfindən irəli sürülən namizəd təyin edilir; buna görə də Paşinyanın hökuməti yenidən qurması gözlənilir.
