Türkiyənin müdafiə naziri Yaşar Gülər, NATO sammitinin Ankarada keçirilməsi ərəfəsində bildirib ki, NATO alyansı dünyadakı təhlükəsizlik dəyişiklikləri fonunda yeni şərtlərə uyğunlaşır və bu proses təşkilatın böhrana girməsi anlamına gəlmir.
Gülər Reuters xəbər agentliyinə verdiyi müsahibədə qeyd edib ki, ABŞ NATO-dan çıxmaq niyyətində deyil, əksinə Avropa müttəfiqlərindən və Kanadadan Avropanın təhlükəsizliyinin təmin edilməsində daha çox məsuliyyət öz üzərlərinə götürmələrini tələb edir. Onun sözlərinə görə, transatlantik bağın qorunması NATO-nun təhlükəsizliyi və caydırıcılığı üçün strateji əhəmiyyətini qoruyub saxlayır.
Gülər həmçinin Türkiyənin bəzi Avropa müdafiə təşəbbüslərindən kənarda saxlanmasını tənqid edərək bildirib ki, Türkiyə kimi hərbi potensialı güclü bir ölkənin bu layihələrdən çıxarılması «strateji cəhətdən yanlış bir yanaşmadır». O vurğulayıb ki, Avropa müdafiə sahəsində Ankara ilə daha geniş əməkdaşlıq qurmalıdır.
Nazir həmçinin açıqlayıb ki, Türkiyə 2035-ci ilə qədər müdafiə xərclərini ümumi daxili məhsulun 5 faizinə çatdırmaq hədəfinə sadiqdir və 2029-cu ilə qədər bütün hərbi imkan hədəflərini reallaşdırmağı planlaşdırır. Gülər əlavə edib ki, Ankara hava müdafiəsini gücləndirmək üçün ABŞ-ın Patriot sistemləri, Fransa və İtaliyanın SAMP/T sistemləri də daxil olmaqla müxtəlif variantları nəzərdən keçirir.
