Türk dünyasının mənəvi paytaxtı Türküstan Süni İntellekt və rəqəmsal inkişaf mövzusunda Türk Dövlətləri Təşkilatının qeyri-rəsmi zirvə toplantısına hazırlaşır.

Araz News-in TRT-yə istinadən verdiyi məlumata görə, toplantı Qazaxıstan prezidenti Kasım-Jomart Tokayevin ev sahibliyi ilə keçiriləcək. Türkiyə, Azərbaycan, Özbəkistan, Qırğızıstan və Quzey Kıbrıs Türk Cümhuriyyətinin liderlərinin toplantıda iştirakı gözlənilir.

Türküstanın küçələri və əsas mərkəzləri Türk Dövlətləri Təşkilatına üzv ölkələrin bayraqları ilə bəzədilib, zirvə üçün qazaxların ənənəvi çadırlarından ilhamlanan xüsusi konstruksiya da qurulub.

Məlumatlara görə, süni intellekt sahəsində əməkdaşlıq, rəqəmsal transformasiya və türk dövlətləri arasında ortaq texnologiya vizyonunun gücləndirilməsi toplantının əsas mövzuları olacaq.

Təxminən iki min illik tarixə malik Türküstan bu gün də türk dünyasının ən önəmli tarixi və mədəni mərkəzlərindən biri sayılır və indi gələcəyin texnologiyaları ilə bağlı strateji müzakirələrə ev sahibliyi edir.