Hörmüz boğazında gərginlik fonunda azı iki ticarət gəmisi bu strateji keçiddən keçərkən atəşə tutulduğunu bildirib.

ArazNews-un Reuters-ə istinadən verdiyi məlumata görə, üç dəniz təhlükəsizliyi və gəmiçilik mənbəyi hadisənin şənbə günü baş verdiyini təsdiqləyib, lakin zərərin miqyası barədə hələ məlumat açıqlanmayıb. Böyük Britaniyanın Dəniz Ticarət Əməliyyatları Təşkilatı da bildirib ki, Oman sahillərinin şimal-şərqində, təxminən 20 dəniz mili məsafədə bir tanker Sepahın sürətli qayıqları tərəfindən atəşə tutulub, lakin ekipaj xəsarət almayıb.

Eyni zamanda təşkilat qeyd edib ki, Sepahın iki sürətli qayığı radio xəbərdarlığı etmədən atəş açıb. Bu hadisə, Xatəmül-Ənbiya qərargahının sözçüsünün Hörmüz boğazında vəziyyətin “əvvəlki halına qayıtdığını” və bu marşrutun İran rejiminin silahlı qüvvələrinin ciddi nəzarəti altında olduğunu açıqlamasından bir neçə saat sonra baş verib. Bildirilib ki, İranla bağlı gəmilərə tətbiq edilən məhdudiyyətlər davam etdikcə bu vəziyyət də davam edəcək.