Polşadan Filippinədək ölkələr ABŞ-dan asılılığa alternativ axtarır.

ArazNews-un Reuters-ə istinadən verdiyi məlumata görə, Yaponiyanın silah ixracı qaydalarını yumşaltmağa hazırlaşması Varşavadan Manilaya qədər Tokiyoya yönələn qlobal diqqət dalğası yaradıb. Bu dəyişiklik İkinci Dünya Müharibəsindən sonra Yaponiyanın silah bazarına ən böyük dönüşü ola bilər.

İran və Ukrayna müharibələrinin ABŞ-ın silah ehtiyatlarına görünməmiş təzyiq göstərdiyi və Vaşinqtonun təhlükəsizlik öhdəliklərinə dair şübhələrin artdığı bir şəraitdə, bəzi müttəfiqlər ABŞ-dan asılılığı azaltmağa və müdafiə mənbələrini şaxələndirməyə çalışır.

Məlumatlara görə, Yaponiya yaxın zamanda Çinə qarşı dəniz gərginliyi yaşayan Filippinə ikinci əl freqatların ixracını təsdiqləyə bilər. Eyni zamanda, Tokio ilə Varşava arasında pilotsuz aparatlara qarşı mübarizə və elektron müharibə kimi sahələrdə hərbi əməkdaşlıq genişlənir.

Bu arada Toshiba və Mitsubishi Electric kimi şirkətlər yeni imkanlardan yararlanmaq üçün istehsal gücünü artırır və işçi qüvvəsini genişləndirir. Mitsubishi şirkətinin menecerlərindən biri bildirib ki, “təkliflər hər tərəfdən gəlir”.

Onilliklər boyu sülhpərvər siyasət yürütməsinə baxmayaraq, Yaponiya bu gün sualtı qayıqlar və döyüş təyyarələri kimi mürəkkəb texnikanı istehsal edə bilən inkişaf etmiş müdafiə sənayesinə malikdir və bu potensial indi hər zamankından daha çox diqqət çəkir.