Hörmətli həmvətənlər, Azərbaycan türk milləti və İranda zülm altında yaşayan bütün xalqlar

Bu gün yeni ili qarşılayarkən, İran rejiminin müharibəçi və avantürist siyasətləri nəticəsində ölkə əhalisinin ardıcıl böhranlar, təhlükəsizlik problemləri və müharibə şəraiti ilə üz-üzə qaldığını görürük. Müharibə, qeyri-sabitlik və iqtisadi-siyasi təzyiqlər bugünkü reallığın acı tərəfidir; lakin bu qaranlıq şəraitdə belə, azad və demokratik gələcəyə olan ümid hələ də yaşayır və güclüdür.

Yeni il İranda yaşayan bütün xalqların və millətlərin arzularının reallaşması yolunda yeni mərhələnin başlanğıcı ola bilər. Bu arzuların mərkəzində azad və ədalətli bir sistemin qurulması dayanır. Biz inanırıq ki, İranın gələcəyi yalnız bütün millət və etnik qrupların bərabər hüquqlara malik olduğu federal respublika sistemi ilə təmin oluna bilər.

Hər cür diktatura, istibdad və müstəmləkəçilik sisteminin aradan qaldırılması, insan ləyaqəti, sosial ədalət və real iştirakın təmin olunduğu yeni bir nizamın qurulması qarşıdakı ilin əsas tələblərindəndir. Bu yolda “Azadlıq, ədalət, milli hökumət” şüarının həyata keçirilməsi yalnız Azərbaycan türk milləti üçün deyil, İranda zülm altında yaşayan bütün xalqlar üçün tarixi və qaçılmaz bir zərurətdir.

Bütün azadlıqsevərlərə ümid, həmrəylik və qələbə dolu bir il arzulayırıq

◽️Məcid Cavadı Araz

Azərbaycan Milli Dirəniş Təşkilatının sözçüsü