۲۰۱۱ ده اؤلکهنی ترک ائدیب تورکیهیه گتدیگیمدن آز سونرا، متوجه اولدوم بیر کسیم میللی فعاللار چوخونلوقلا اردبیل بؤلگهسیندن میللی دیرنیش تشکیلاتینا هئچ یاخشی باخمیرلار. سونرا گوردوم آشاغی-یوخاری بوتون تشکیلاتلار ایچه قاپانیق و دیگر تشکیلاتلارلا رقابتدن اؤته، نیفرتله یاناشیب، بعضاً کین بسلهییرلر. او جوملهدن گؤردوم کی دوکتور چهرگانییه چوخلاری قیزقیندیلار. اوزامانا کیمی دوکتورو محبوب بیر اینسان بیلیردیم، چونکو عادی اینسانیمیز اونو سئوردی و تانییاردی. یاواش یاواش خاریجده یاشادیغیم ایللر بو رقابتلرین نه بویوتلاردا اولدوغونو گؤروب و آنلادیم. حال بوکی ایچریده بو رقابتلر بو بویوتلاردا دئییلدیلر (او ایللر ده) و چوخ تأسفلر کی گؤرورم بوگون خاریجدکی مسموم فضا عیناً ایچرییهده منتقل اولوب دور.
هر زامان دوشونردیم بو مسئله او قدرده آنورمال بیر شئی دئییل. چونکو بیز نه دمکراسی گؤرموشوک و نه احزاب دیه بیر قاورامی لمس ائتمیشیک. تورکوسو بیز بیر ایجتیمانین ایچینده یاشامیشیق کی قارداش-قارداشلا شراکت ائتمهیی باشارامیر.
بوگون احمد اوبالی و عابباس لسانینین سمپاتلارینین بیانلارین دیرنیش علیهینه گؤروب اوخودوم. تیکرارلانان آمما هئچ سند اله وئرمیهن اتهام لار و ادعالار تکراری و بیر-بیرینه بنظر جومله لرله ایفا اولونوردو. آنجاق بو بیانلارین فحواسیندا گیزلی غصب، کین و آجیماسیزجا حیسلری گؤردوم. منه ائله گلدیکی اللرینده اولسا و قادیر اولسالار دیرنیشچیلری یئر اوزوندن سیلمهیه حاضیردیلار. عینی حیسی بوگون احمد اوبالی و جاواد ایسماعیل بئی لینین سیماسیندا دا گؤردوم.
بو هئچ یاخشی علامت دئیل. من دوشونورم کی میللی حرکت موفق بیر جریان دئییل. گئچن ییرمی ایلده بوقدر داد و بیداد، زیندان، تظاهرات، اعتصاب غذا و ... رغمن بیزیم نائلیهتیمیز اولماییب. نه اساس ایستکلریمیز آنادیلی، اصل ۱۵، ۱۹ و ... دولت دن ایمتیاز آلا بیلمهمیشیک و نه طبیعی حاققیمیز اورموگؤلو مسئلهسینده دولت مجبور ائده بیلمهمیشیک ایستکلریمیزه بویون وئرسین. طبیعی رقیبلریمیز یعنی کوردلردن هر زمینهده باخساق دالیییق و اونلار گون به گون و سنگر به سنگر بیزی گئری پوسگوردورلر. ارمنیستان و ایرانین خاریجی سیاستینهده هئچ تأثیریمیز اولماییب. عینی حال دا تورکیه و آزربایجان دولتلری و حتی میلتلریده بیزی جیددیه آلمیر.
دئمک حزیمت و ازیلمیشلیک دویغوسو بیزیم سینیرلاریمیزی زورلاییر. تورکه مثلی دئسم یئرین برکلیگیندن اؤکوز-اؤکوزدن بو شکستلری بیلیر. بوگون بو بیاننامهلری اوخودوقدان سونرا باخدیم گؤردوم کی عابباس لسانی و احمدین آداملاری قاراباغین اینتیقامین بئله دیرنیشدن آلماق ایستهییرلر؛ و بو منی قورخوددو. صاباح بیریسی-گون دیرنیشچیلر، ایستقلالچیلار و گاموحچیلاردا بئله بیر قناعته گلسهلر نه اولاجاق؟
منجه جواب معلوم دور. میللی حرکت دییه بیر شئی قالمیاجاقدیر. اله بودا دوشمانین ایستگیدیر. بوگون بیزلر هاممیمیز ایستهیهرک و یا ایستهمهدن دوشمانا خیدمت ائدیریک. بو سون دارتیشما چوخ وهیم یئرلره گئدیب چیخاجاق دیر. بونو بوگون احمدین گؤزونده گؤردوم.
