واشینقتون، آمریکا، روسیه و اوکراینا نوماینده‌لرینین ۱۰ و ۱۱ نوامبرده بیرلشمیش عرب امیرلیکلرینین پایتختی ابوظبی‌ده گؤروشه‌جکلرینی اعلان ائتدی. گؤروشده اوکراینا ساواشینا سون قویماغین یوللاری و بیر تهلوکه‌سیزلیک راضیلاشماسینا چاتماق مذاکره ائدیله‌جک.
آراز نیوزون رویترزدن نقل ائتدیگی خبره گؤره، آمریکانین خوصوصی نوماینده‌سی استیو ویتکاف ۲ نوامبر دوشنبه گونو، دانیشیقلارین ساواشین سونا چاتماسی، راضیلاشمادان سونراکی تهلوکه‌سیزلیک ضمانتلری و حربی گرگینلیگین آزالماسی اوزرینده دایاناجاغینی دئدی.
عئینی زاماندا آمریکالی دانیشیقچیلارین بو هفته بروکسلده فرانسا، آلمانیا، بریتانیا، آوروپا بیرلیگی و ناتو نوماینده‌لری ایله گؤروشمه‌سی نظرده توتولور. بو گؤروشلرده اوکراینانین تهلوکه‌سیزلیک ضمانتلری، آوروپانین گله‌جک تهلوکه‌سیزلیک قورولوشو و اؤلکه‌نین یئنیدن قورولماسینا اقتصادی دستک دانیشیلاجاق.
بو چابالار، موسکو ایله کی‌یف آراسیندا باریش شرطلری اوستونده‌کی اساسلی فیکیر آیریلیقلاری هله ده قالدیغی و دونالد ترامپین راضیلاشمایا چاتماق اوچون دیپلوماتیک تضییقلری آرتیردیغی بیر واختدا گئدیر.
