ایرانلا عراق آراسیندا اؤنملی سرحد کئچیدلریندن بیرینین باغلانماسی ایله عینی زاماندا، ایران–پاکستان سرحدینده بیر نئچه گونلوک دایانمادان سونرا تجارت تدریجاً یئنی‌دن باشلاییب. بو گلیشمه‌لر، واشینقتونون ایرانلا اقتصادی آلیش‌وئریشی محدودلاشدیرماق اوچون قونشو اؤلکه‌لره باسقی ائتدیگینه دائیر گزارش‌لرله عینی زامانا دوشوب.
آراز نیوزون رویترز‌دن نقل ائتدیگینه گؤره، عراق چارشنبه ۲۹ مهر گونو الشیب–چذابه سرحد کئچیدینی یئنی بیر آچیقلامایا قدر یولچولارا و تجاری یوک ماشینلارینا باغلاییب. بغداد بو قرارین سببی کیمی تکنیکی مشکل‌لری و گوونلیک تدبیرلرینین یئنی‌دن گؤز‌دن کئچیریلمه‌سی ضرورتی‌نی گؤستریب.
آنجاق فرانس پرس خبر آژانسی ایکی عراقلې سیاسی قایناقدان نقل ائده‌رک گزارش وئریب، آمریکا ایران اسلام جمهوریتینه اقتصادی باسقینی آرتیرماق اوچون بغدادى ایرانلا داها چوخ سرحد کئچیدینی باغلاماغا تشویق ائدیر. بو ادعا هله موستقیل شکیلده دوغرولانماییب.
عینی زاماندا، تسنیمین گزارشینه گؤره، پاکستان سرحدینده‌کی ریمدان–گبد کئچیدی ایکی اؤلکه مسئول‌لارینین دانیشیقلاریندان سونرا یئنی‌دن آچیلیب و تجاری یوکلرین، اؤزللیکله تئز خراب اولان ماللارین گؤمروکدن بوراخیلماسی باشلاییب.
بو سرحد محدودیت‌لری تجارتده اختلال، داشیما خرج‌لرینین آرتماسی و تاجیرلرین ضرر گؤرمه‌سی ایله باغلی قایغیلار یارادیب. آنجاق ایندیه‌دک عراقلا پاکستانین قرارلاری آراسیندا بیر‌باشا باغلانتی اولدوغو تأیید ائدیلمه‌ییب.
