آراز نیوز ـ یاییلان خبرلره گؤره، تبریزین شهریار آراشدیرما موسسهسینده شاهنامه مربیسی تربیت ائتمک آماجی ایله دؤردونجو «شاهنامهپژوهی و شاهنامهخوانی» کلاسلاری باشلانیب. بو تعلیملرده شرقی و غربی آذربایجان، زنجان و اردبیلدن اشتراکچیلار واردیر.
بو اوتوروملارین کئچیریلدیگی شهریار آراشدیرما موسسهسینین قورولوش آماجلاری ایچینده آذربایجانین دیلی، ادبیاتی، مدنیتی و تاریخی حاققیندا علمی آراشدیرمالار آپارماق قئید اولوبدور.
هر شئیدن اؤنجه، بئله بیر وظیفهسی اولان بیر قورومدا بو جۆر بیر دؤورهنین کئچیریلمهسی تمل بیر سورغو اورتایا چیخاریر: آذربایجانین دوغما تورک دیلینی اؤیرتمک، اونون سئچکین شاعیرلرینی تانیتماق و بو تورپاغین ادبی میراثینی گنج نسله انتقال ائتدیرمک، بو موسسهنین پروقراملاریندا هانسی یئره صاحیبدیر؟ بو موسسه ایندییهدک آذربایجانین اصیل کیملیگی اولان تورک دیلی و مدنیتینه بیر اؤنم وئریب می؟!
بو سورغو ایراندا وار اولان دیل و مدنیت آیریسئچکیلیگی باغلامیندا داها دا اؤنم قازانیر. بینالخالق قورولوشلار، او جوملهدن بینالخالق عفو تشکیلاتی ۲۰۲۵-جی ایل حساباتیندا آذربایجان تورکلری و باشقا ملی قروپلارا قارشی آیریسئچکیلیکدن، اوشاقلارین آنا دیلینده تحصیلدن محروم ائدیلمهسیندن و بو گروهلارین حقوق مودافیعهچیلرینه قارشی غرضلی داورانیشلاردان خبر وئریب.
شوبههسیز بئله بیر زمینه و شرایطده بئله فعالیتلر باشقا بیر آنلام قازانیر.
ایراندا دیل استعمارینین سیمگهسی اولان شاهنامهنین یایغینلاشدیریلماسی، دیل محرومیتلری باغلامیندا و آذربایجانین تورک کیملیگی و اصیل تاریخی میراثینین دانیلماسی ایله بیر یئره گلدیگی زامان، شوبههسیز بو جعرافیانین تاریخینی دانماق و تحریف ائتمک اولاراق گؤرولمهلیدیر.
ایرانشهریچلیگین انحصارچی روایتی کی، یالنیز بیر دیلی و بیر تاریخی روایتی اؤلچو سانیر، گئریچی (ارتجاعی) و باشقالارینی دوشمانلاشدیران (دیگرستیز) بیر یاناشمادیر؛ چونکی بو جوغرافیانین اینسانلارینین اؤز تاریخینی تانیماق و روایت ائتمک حاققینی اورتادان قالدیرماغا چالیشیر.
آذربایجان تورکجهسینده شعر دئین شاعیرلرین دَگرلی اثرلری تحصیل، آراشدیرما و یایینلانما امکانیندان یوخسون اولدوغو بیر حالدا، شاهنامهخوانی و شاهنامهپژوهلوغون یایغینلاشدیریلماسی یالنیز آذربایجان خالقینین آنا دیلینی، یاشامیش تجروبهسینی، دویغولارینی و تاریخی حافیظهسینی دانماق و تحریف ائتمک دوغرولتوسوندا دَگرلندیریله بیلر.
و البته بو فعالیتین، باشقا خالقلارا دوشمنچیلیک و قادیندوشمنلیگی سیمگهسی اولان بیر اثر (شاهنامه) ایله اورتایا قویولماسی دا بو جغرافیانین آیریجا بیر طالعسیزلیگیدیر.
