یمن عسگری منبعلری، بیر نئچه جبههده حوثیلرله دؤیوشلرین شیددتلندیگینی بیلدیریب. دؤولت گوجلری الجوف استانیندا حوثیلرین موقعلرینی، سیلاح انبارلارینی و راکت آتما پلتفرمالارینی هدف آلیب.
آراز نیوزون العربیهدن نقل ائتدیگینه گؤره، دؤولت گوجلرینین سالدیریلاری «المحزمات» بؤلگهسینی و «خب و الشعف» فرماندارلیغینین بیر بؤلومونو قاپساییب. عینی زاماندا تعزین دوغوسوندا آغیر سیلاحلارین ایشلدیلدیگی سرت دؤیوشلر داوام ائدیر و دؤولت گوجلری نعمان داغینی و اطراف بؤلگهلری یئنیدن اَله کئچیردیکلرینی ایددیعا ائدیبلر.
الحدیده استانیندا دا دؤولت گوجلری، حوثیلرین حیس جبههسیندهکی سالدیریسینی دفع ائتدیکلرینی آچیقلاییب. دؤیوشلرین دباس داغی یاخینلیغیندا هله داوام ائتدیگی بیلدیریلیب.
