دونیا بهایی جامعهسی، ۳۱ مرداددان ۳ شهریوره قدر ایرانین یئددی استانیندا ان آز ۱۱ بهایی وطنداشین توتوقلاندیغینی و بعضیلرینین مالوارلیغینین گئنیش اؤلچوده امنیت قووّهلری طرفیندن ضبط ائدیلدیگینی آچیقلاییب.
آراز نیوزون دونیا بهایی جامعهسیندن نقل ائتدیگینه گؤره، بو قورومون بیرلشمیش میللتلر تشکیلاتیندا تمثیلچیسی سیمین فهندژ بیلدیریب کی، امنیت گوجلری توتوقلانانلارین ائولرینی و ایش یئرلرینی آختارارکن الکترونیک آراجلار، ایش تجهیزاتلاری، قیزیل و جواهرات، ائولنمه اوزوکلری و حتی اوشاق اویونجاقلارینی دا ضبط ائدیبلر. او بو ایشلری «گونون اورتاسیندا دؤولت اوغورلوغو» اولاراق توصیف ائدیب.
بو توتوقلامالار، بهاییلره قارشی امنیت و قضایی باسقیلارین داوامیندا باش وئریب. اولوسلاراراسی انسان حاقلاری قوروملاری داها اؤنجه ده بو دینی آزینلیغا قارشی توتوقلاما، مالوارلیغینین ضبطی و اقتصادی آیریمچیلیق حاققیندا دفعهلرجه خبردارلیق ائدیبلر.
