بیناب بلدیهسینده چالیشان بیر قروپ شرکتی ایشچی، حوکومتین یئنی مصوبهسینین اویقولانماماسینا اعتراض ائدهرک، شرکتی ایشچیلرین معاش و سیغورتا (بیمه) اؤدنیشلرینین بیرباشا اؤز حسابلارینا یاتیریلماسینی ایستهییبلر.
آراز نیوزون ایلنادان نقل ائتدیگینه گؤره، ایشچیلر بیلدیریبلر «شرکتی ایشچیلرین اؤدَمه سیستمینین دوزنلنمه پلانی» مرداد آییندان اجرایا باشلاسادا، بیناب بلدیهسینده چالیشان تقریباً ۱۵۰ شرکتی ایشچی هله بیرباشا اؤدَمهدن یارارلانمیر.
ایشچیلر پیمانکاری شرکتلرینین هله ده فعالیتده قالماسینی دا تنقید ائدیبلر و دئییبلر ایللرجه واسطهلرین آرادان قالدیریلماسی وعده وئریلسه ده، سوندا «یاریمچیق» بیر پلان تصویب اولونوب.
اونلار بیناب بلدیهسی مسئوللاریندان مصوبهنین دقیق اجرا زامانینی آچیقلامالارینی ایستهییبلر.
