آمریکا عدالت باخانلیغی، «مبنا» مؤسسهسی ایله باغلانتیلی ۱۷ ایران وطنداشینا قارشی گئنیش چاپلی سایبری نفوذ و معلومات اوغورلوغوندا ایشتیراک اتهامی ایرهلی سورولدویونو آچیقلاییب.
آراز نیوزون آمریکا عدالت باخانلیغینین رسمی بیلدیریسیندن نقل ائتدیگینه گؤره، متهملر «مبنا» مؤسسهسینین اویهلری و عامللری اولاراق تانیدیلیب. ادعایا گؤره، اونلارین بعضی عملیاتلاری ۲۰۱۳دن بری سپاه پاسداران و ایران جمهوریتینین دیگر دؤولت و اونیورسیته قوروملاری آدینا یئرینه یئتیریلیب.
اتهامنامهیه گؤره، بو شبکه ۱۴۴ آمریکا اونیورسیتهسینی و ۱۷۸ خارجی اونیورسیتهنی، ان آز ۴۲ آمریکا شرکتی و ۱۱ خارجی شرکتی، بئش دؤولت قورومونو و ایکی غیردؤولت قورومونو هدف آلیب.
آمریکالی دادستانلار، عملیات بویونجا ۳۱ ترابایتدان چوخ اونیورسیته معلوماتی، آراشدیرما، فکری مالکیت و دیگر بیلگیلرین اوغورلاندیغینی اؤنه سورور. ۱۷ متهمدن ۹ نفر داها اؤنجه ۲۰۱۸ ایلینده حقوقی تعقیب آلتینا آلینمیشدی.
