غزه یول خریطهسینین اویقولانماسی اوچون دیپلوماتیک چابالار آرتارکن، حماسین سیلاحسیزلاشدیریلماسی اوزریندهکی اختلاف هله ده بو سورهجین قاباغا گئتمهسینین ان بؤیوک انگلی اولاراق قالیر.
آراز نیوزون «نشنال اینترست» نشریهسینده سون گلیشمهلر حاققیندا یایینلانان تحلیلدن نقل ائتدیگینه گؤره، جرد کوشنرین قاهرهده خلیل الحیه ایله بیرباشا گؤروشمهسی، بنیامین نتانیاهو ایله دؤرد ساعتلیک مذاکرهسی و سکیز موسلمان اؤلکهنین اورتاق موقئعی، غزهنین گلهجگی اوزریندهکی درین اختلافلاری اورتایا چیخاریب.
کوشنر قاهرهده حماسدان سیلاحسیزلاشما اوچون عملی آدیملار آتماسینی، غزه ادارهسینی تکنوکرات بیر کومیتَیه تاپشیرماسینی و اولوسلاراراسی ثبات گوجونون یئرلشدیریلمهسینه ضمینه یاراتماسینی ایستهییب. اسرائیل ده اؤز گوجلرینی غزهدن چکمهسینی حماسین تام سیلاحسیزلاشدیریلماسی و بونون دوغرولانماسی شرطینه باغلاییب.
بونا قارشی، تورکیه، سعودی عربیستان، قطر، امارات، مصر، اردن، پاکستان و اندونزیا، اسرائیلی آمریکانین دستکلهدیگی یول خریطهسینین اویقولانماسینا انگل یاراتماقلا سوچلاییبلار. حماس دا پلانی قبول ائتدیگینی، فقط اسرائیلین اؤز تعهدلرینه عمل ائتمهدیگینی اؤنه سورور.
«نشنال اینترست» بو روایتی رد ائدیر و حماسین گئرچک و دوغرولانا بیلن بیر شکیلده سیلاحسیزلاشدیریلماسی اولمادان قالیجی هئچ بیر آنلاشمانین یارانا بیلمهیهجگینی یازیر. نشریهیه گؤره، اسرائیلین بو شرط یئرینه یئتیریلمهدن چکیلمهسی، حماسین عسکری گوجونو یئنیدن قورماسینا شرایط یارادا بیلر.
نشریه همچنین غزهدهکی چیخمازی آمریکا و ایران آراسینداکی قارشیقارشییا گلمهله باغلاییر و بحرانین دوام ائتمهسینین عرب اؤلکهلریله واشینگتون آراسینداکی ایشبیرلیگینی و سعودی عربیستان ایله اسرائیل آراسیندا علاقهلرین نورماللاشما احتیمالینی زورلاشدیردیغینی بیلدیریر.
