آراز نیوز: اورمو گؤلۆنۆ احیا ستادینین تلفیق و پلانلاما دفترینین مودیری، سعید عیسیپور، گؤلۆن سو وضعیتینین یاخشیلاشماسی و سوْن اوْن ایلده یئنی بیر رکوردون ثبتی حاققیندا خبر وئردی. اوْ، سو قایناقلارینین دۇزگۆن ایداره اوْلونماسی و غیرمجاز استفادهلرین آزالدیلماسی ایله بوْ ایلین پاییزیندا اورمو گؤلۆنده سابقهسیز بیر سو حجمینین ثبت اوْلونما احتیمالینی بیان ائتدی.
عیسیپور مناسب یاغینتیلار و سو بوراخیلیشلاری سایهسینده گؤلۆن سویهسی و وسعتینین اؤنجهکی ایللره قیاسلا اؤنملی درجهده آرتماسینا اشاره ائدیب دئدی: بو شرایطین داوامی، غیرمجاز سو استفادهلرینین دۆزهلمهسی و کند تصرفاتی (اکینچیلیک) بؤلمهسینده سو مصرفینین یوزده ۴۰ آزالدیلماسی پروقرامینین دقیق ایجرا اوْلونماسینا باغلیدیر.
اوْ علاوه ائلهدی: اؤنگؤرولره (پیشبینیلره) گؤره، بوْ ایلین پاییز یاغینتیلاری واختیندا باشلاناجاق و گؤلۆن موجود سو حجمینین بیر بؤلۆمۆ ده قورونوب ساخلانیلاجاقدیر. بوْ موضوع اورمو گؤلۆنۆن سو وضعیتینی سوْن ایللرین ان یاخشی حدّینه یئتیره بیلر.
اورمو گؤلۆ احیا ستادینین تلفیق و پلانلاما دفترینین مودیری، قوروما تدبیرلرینین و سو قایناقلارینین دۇزگۆن ایداره ائدیلمهسینین داوامی ایله، گؤلون احیا پروسهسینین گهلجک ایللرده ده داوام ائتمهسینه اومیدوارلیق ائتدی.
