سون دؤورلرده بینالخالق انسان حاقلاری تشکیلاتلارینین یایدیغی راپورلاردا دا ایران انقلاب کشیکچیلرینین (سپاه) ساواش شرایطینده ۱۲ یاشینا قدر اولان اوشاقلاری "وطن مۆدافیهچیسی" پروقراملاری چرچیوهسینده نظامی قورولوشلارا جلب ائتمهگه باشلادیغی قید اولونور. همین راپورلاردا اوشاقلارین نظارت منطقهلرینده (ایست بازرسی) خیدمته جلب ائدیلمهسی، پاتروْل (گَشت) فعالیتلرینده، لجستیک دستک ایشلرینده و ساواشا حاضیرلیق کاراکترلئ پروقراملاریندا ایشتیراکینینین سندلشدیریلدیگی بیلدیریلیر.
الده اولونان معلوماتلار و گؤرونتولرده، گۆنئی آذربایجاندا یاشایان تۆرک اوشاقلارینین دا حربی تعلیم پروقراملارینا جلب اولوندوغو موشاهیده ائدیلیر.
اوشاقلارا حربی تعلیم وئرمک و سیلاحلی موناقیشهلره حاضیرلیق مقصدیله حربی پروقراملاردا ایشتیراک اتدیرمک بینالخالق حوقوق باخیمیندان سون درجه جیدی سوچ حساب اولونور.
بینالخالق سوچلار محکمهسینین روم استاتوتونا اساساً، ۱۵ یاشیندان آشاغی اوشاقلارین سیلاحلی قووهلره و یا سیلاحلی قروپلارا جلب ائدیلمه سی، حربی خیدمته آپاریلماسی و یا سیلاحلی موناقیشهلرده ایستیفاده ائدیلمهسی «ساواش جینایتی» ساییلیر.
بیرلشمیش میلتلر تشکیلاتینین اوشاق حاقلاری کونوانسیونو و اوشاقلارین سیلاحلی موناقیشهلرده ایشتیراکینا دایر پروتوکوْل دؤولتلره اوشاقلاری سیلاحلی موناقیشهلردن قوروماق عؤهدهلیگی وئریر. اوشاقلارین ساواش مقصدیله حربی حاضیرلیغا جلب اولونماسی بو عؤهدهلیکلرله اویغون دئییل.
بینالخالق حوقوق متخصصلرینین فیکرینجه، اوشاقلارین سیستملی شکیلده سیلاحلی حاضیرلیغا جلب اولونماسینی عکس ائتدیرن عکس و ویدئو ماتئریاللار گلهجکده آپاریلا بیلهجک بینالخالق سورغولاردا ثبوت کیمی ایستیفاده اولونا بیلهجک اهمیتلی دلیللر حساب ائدیله بیلر. بونا گؤره ده بئله حاللارین موستقیل بینالخالق مکانیزملر طرفیندن آراشدیریلماسی و مسئول شخصلرین بینالخالق حوقوق چرچیوهسینده جاواب وئرمهسی ضروریدیر.
