دونیا آزربایجانلیلارینین همرایلیک گونو (31 دئکابر -۱۰دی) موناسیبتی ایله آزربایجان میللی دیرنیش تشکیلاتنین تبریک مئساژی:

بؤیوک آزربایجان تورک میلتی،

دونیا آزربایجانلیلارینین همرایلیک گونو (31 دئکابر -۱۰دی) آیریلیق دؤوارنین ییخیلدیغی و ساختا سرحدلرینین آرادان گؤتورولدوگو گون اولاراق میلتیمیزین یاداشینا یازیلمیشدیر و وطنیمیزین گونئی ینده، قوزئی ینده و یا دونیانین هر-هانسی اؤلکه‌سینده یاشایان هر بیر آزربایجان تورکو بو گونو میللی بیرلیک و برابرلیک گونو اولاراق گؤرور. باشی اوجا میلتیمیزین قهرمان اؤولادلاری اؤز جانلاری و آل قانلارینی فدا ائدرک، بو گون بیزه غورور و شرف دولو بیر تاریخ میراث بوراخیبلار. شوبهه‌سیز بو گون آزربایجانیمیزین اوچ رنگلی بایراغینین گؤی خزرین اوزرینده دالغالانماسینی روس ائمپئریالیزمینین سیبیرده جانلارینا قییدیغی و اعداما محکوم ائتدیگی مینلرجه آزربایجان اؤولادینا بورجلویوق. عئینی زاماندا بو گون گونئی آزربایجانیمیزدا رنگینی شهیتلریمیزین آل قانیندان آلان میللی موجادیله‌میز،فارس شووینیزمینین جانینا قورخو سالیبسا بو گئچمیشده و بو گون جانینی و مالینی میلتیمیزدن اسیرگه مه‌ین ایگیدلریمیزین فداکارلیکلارینین سایه‌سینده‌دیر. نه یازیق کی، دوشمنلر میلتیمیزه ضربه وورماقدان و آیاغینین آلتینی قازماقدان اوسانمیرلار. قاراباغیمیز ائرمنی ایشقالی آلتیندا، گونئی آزربایجان فارس شووئنیزمینین تاپداغینین آلتیندادیر. بو شرطلرده بوتؤو آزربایجانیمیزدا میللی موجادیله وار گوجویله قاباغا آپاریلمالیدیر و خوصوصیله گنجلریمیز جانیم باشیم دئمه دن مئیداندا اولمادیرلار. بئله بیر گونده میللی بیرلیک و همرایلیگه چوخ احتییاجیمیز واردیر. دوشمن آزربایجان تورکلوگونو تک پارچا بیر یومروق اولاراق گؤرمه‌لی و قورخوسوندان تیر-تیر اسمه‌لیدیر.

آزربایجان میللی دیر‌نیش تشکیلاتی دونیا آزربایجانلیلارینین همرایلیک گونونو (31 دئکابر-۱۰دی) آزربایجان تورک میلتینین هر بیر فردینه تبریک دئییب بیر داها توم میللتیمیزی بیرلیک، برابرلیک و همرایلیگه دعوت ائدیر.

آزربایجان میللی دیرنیش تشکیلاتینین بیرینجی دبیری

داوود توران

31/12/2013