Donald Tramp cümə axşamı Ankarada Türk Dövlətləri Təşkilatının dövlət başçılarının şərəfinə verilən şam yeməyi zamanı Rəcəb Tayyib Ərdoğanla telefonla danışıb. Türkiyə Prezident Administrasiyasının Kommunikasiya İdarəsinin məlumatına görə, bu, iki prezident arasında 24 saatdan az müddətdə baş tutan ikinci telefon danışığı olub.
Ərdoğan ziyafət iştirakçılarının salamını Trampa çatdırıb, ABŞ prezidenti isə sammitə uğurlar arzulayıb. Türkiyə prezidenti əhalisi 200 milyondan çox olan bu təşkilatı Türkistanda sabitlik və etimad mərkəzi adlandırıb. O, çərşənbə günü baş tutan telefon danışığında da Türkiyənin Hörmüz boğazında və Yəməndə baş verən prosesləri yaxından izlədiyini bildirmişdi.
Liderlərin «Türk əsri: dildə, düşüncədə və əməldə birlik» şüarı altında keçirilən 13-cü sammiti cümə gününədək Ankarada davam edəcək. Liderlərin «Ankara Bəyannaməsi»ni qəbul edəcəyi, təşkilatda növbəti sədrliyin isə Azərbaycandan Türkiyəyə keçəcəyi gözlənilir.
