Maliyyə vəsaitlərinin köçürülməsindən xəbərdar olan iki şəxs bildirib ki, Livan Hizbullahı sentyabr ayında İsraillə müharibə zamanı didərgin düşmüş ailələrə yardım etmək üçün İran rejimindən 200 milyon dollar alıb. Bu vəsait ABŞ-ın Tehrana iqtisadi təzyiqlərinin gücləndiyi və Hizbullaha pul köçürməyin çətinləşdiyi bir dövrdə təmin edilib. Pulun qrupun bu ilki müharibədən zərər çəkmiş ailələrin bir hissəsinə göstərəcəyi ilk böyük yardım olacağı gözlənilir.
Açıqlanan plana əsasən, ilk mərhələdə tələblərə cavab verən təxminən 50 min ailənin hər birinə 3 min dollar veriləcək. Kəndləri dağıdılmış və ya İsrail qüvvələrinin orada olması səbəbindən geri qayıda bilməyən ailələrə üstünlük veriləcək. Hizbullahın rəsmilərindən biri didərginlərə yardım üçün vəsait ayrıldığını təsdiqləyib və onun bölüşdürülməsi planının yaxın günlərdə elan olunacağını deyib. Lakin o, pulun mənbəyi və dəqiq məbləği barədə izahat verməyib.
ABŞ Dövlət Departamentinin sözçüsü Tommi Piqott isə belə bir pulun mövcudluğunu təkzib edib. O, Hizbullahı nüfuzunu qorumaq üçün İrandan pul daxil olduğu barədə uydurma iddialar yaymaqda ittiham edib.
Məlumatlı şəxslərin sözlərinə görə, pul köçürməsində iştirak edən vasitəçilər Hizbullahla əməkdaşlığın riskləri səbəbindən 20 faiz komissiya haqqı alıblar. Onlardan biri bu məbləği adi tarifdən dörd dəfə yüksək adlandırıb. Pulun hansı yolla köçürüldüyü açıqlanmayıb. Bu maliyyə yardımı barədə xəbər İranda güzəran problemlərinin kəskinləşdiyi bir vaxtda yayılır. Tehrana bağlı regional qruplara vəsait ayrılması daha əvvəl də vətəndaşların etirazına səbəb olub.
