İranın BMT-dəki nümayəndəsi altı ərəb ölkəsinin şikayətinə cavab olaraq onları hücumlarda əməkdaşlıq etməkdə ittiham edib.

Araz News-un İranın Səda və Sima agentliyinə istinadən verdiyi məlumata görə, İranın BMT-dəki daimi nümayəndəsi baş katibə və Təhlükəsizlik Şurasının sədrinə ünvanladığı məktubda regionun altı ərəb ölkəsinin son etirazına reaksiya verib.

Qətər, BƏƏ, İordaniya, Bəhreyn, Küveyt və Səudiyyə Ərəbistanı daha əvvəl ayrı-ayrı məktublarla Təhlükəsizlik Şurasına müraciət edərək İranı öz ərazilərinə hücum etməkdə ittiham etmiş və bu addımların pislənməsini tələb etmişdilər.

Buna cavab olaraq Əmir Səid İrəvani bildirib ki, bu ölkələr hərbi bazalarını təqdim etməklə və İrana qarşı hava əməliyyatlarını asanlaşdırmaqla hücumlarda rol oynayıblar.

O, həmçinin İranın addımlarını “hücumlara cavab” və “özünümüdafiə” çərçivəsində qiymətləndirib və xəbərdarlıq edib ki, onun sözlərinə görə bu prosesdə iştirak edən ölkələr nəticələrə görə məsuliyyət daşıyacaqlar.

Bu qarşılıqlı ittihamlar son hərbi hadisələr fonunda İran və regionun bəzi ölkələri arasında gərginliyin ciddi şəkildə artdığı bir vaxta təsadüf edir.