İran ABŞ-a yeni təklif təqdim edib; plana görə, Hörmüz boğazı açılır və müharibə dayandırılır, lakin nüvə danışıqları daha sonrakı mərhələyə saxlanılır.

ArazNews-un Axios-a istinadən verdiyi məlumata görə, bu təklif Pakistan vasitəçiləri üzərindən Vaşinqtona çatdırılıb və ilkin mərhələdə Hörmüz böhranının həlli və ABŞ-ın dəniz blokadasının aradan qaldırılmasına fokuslanır. Plana əsasən, atəşkəs uzun müddətə uzadılır və ya tərəflər müharibənin daimi başa çatması barədə razılığa gəlir.

Axios yazır ki, İranın xarici işlər naziri Abbas Əraqçi bu planı İslamabaddakı görüşlərdə təqdim edib və İran rəhbərliyində nüvə məsələsində ABŞ-a veriləcək güzəştlər barədə konsensus olmadığını bildirib. ABŞ isə ən azı on il müddətinə uranın zənginləşdirilməsinin dayandırılmasını və zənginləşdirilmiş uran ehtiyatlarının ölkədən çıxarılmasını tələb edir.

Ağ Ev bu təklifin alındığını təsdiqləməyib. Sözçü bildirib ki, ABŞ “media vasitəsilə danışıqlar aparmır” və Donald Tramp yalnız İranın nüvə silahı əldə etməsinin qarşısını alan razılaşmanı qəbul edəcək.