Demokrat respublikaçılar və federal-demokratların birgə konqresi yaydığı bəyanatda İranda, xüsusilə Azərbaycanda siyasi məhbusların vəziyyəti ilə bağlı narahatlığını ifadə edib və onların fundamental hüquqlarının pozulduğunu bildirib.

ArazNews-un məlumatına görə, bu siyasi ittifaqın mediasına istinadən, bəyanatda universitet müəllimi və hüquqşünas Əbülfüzl Rəncbərinin vəziyyətinə diqqət çəkilib. Onun “yer üzündə fəsad törətmək” ittihamı ilə üzləşdiyi və Təbrizdə hakim Hüseyn Fəthnejadın sədrliyi ilə keçiriləcək üçüncü məhkəmə iclasına çıxarılacağı bildirilib. Bu ittiham təsdiqlənəcəyi halda edam hökmü və işin Ali Məhkəməyə göndərilməsi riski qeyd olunub.

Eyni zamanda bəyanatda Əbdüləziz Əzimi Qədim, Vədud Əsədi, Tahir Nəqəvi, Abbas Lisanı və onlarla digər fəalın adı çəkilərək onların vəziyyəti ilə bağlı narahatlığın davam etdiyi vurğulanıb. Bu qurum İran rejiminin insan haqlarını pozmasını pisləyərək ağır hökmlərin dərhal dayandırılmasını və bütün siyasi və vicdan məhbuslarının qeyd-şərtsiz azad edilməsini tələb edib.

Bəyanatın digər hissəsində İranın beynəlxalq öhdəliklərinə diqqət çəkilərək bu cür addımların Mülki və Siyasi Hüquqlar üzrə Beynəlxalq Paktın açıq şəkildə pozulması olduğu qeyd edilib. Həmçinin bildirilib ki, İranda siyasi və vətəndaş fəallara qarşı aparılan məhkəmə prosesləri ədalətli məhkəmə standartlarına cavab vermir və həyat hüququ, müdafiə hüququ kimi əsas prinsiplərlə ziddiyyət təşkil edir. Bu səbəbdən konqres beynəlxalq qurumları İrandakı siyasi məhbusların vəziyyətinə dərhal diqqət yetirməyə və insan haqları ilə bağlı təzyiqləri artırmağa çağırıb.