NATO-nun baş katibi Mark Rutte Türkiyənin müdafiə sənayesi sahəsində “inqilab” etdiyini və bu irəliləyişlərin digər ölkələr üçün nümunə ola biləcəyini bildirib.

ArazNews-un Anadolu agentliyinə istinadən verdiyi məlumata görə, Rutte “Aselsan” müdafiə sənayesi şirkətinə səfəri zamanı istehsalın sürətləndirilməsi və innovasiyanın gücləndirilməsinin NATO-nun əsas prioritetlərindən biri olduğunu deyib. O əlavə edib ki, bu mövzu iyul ayında Ankarada keçiriləcək NATO sammitinin gündəmində olacaq.

Rutte təhlükəsizlik təhdidlərinə də toxunaraq bildirib ki, NATO Rusiya, Çin və İrandan gələn risklərlə üz-üzədir və alyans bu təhdidlərə qarşı hazırdır.

O həmçinin qeyd edib ki, NATO daha əvvəl İrandan buraxılan və Türkiyənin hava məkanına daxil olan ballistik raketləri ələ keçirib və vurğulayıb ki, alyans Türkiyəni və digər müttəfiqlərini qorumaq üçün “lazım olan hər şeyi” edəcək.

Bu çərçivədə Türkiyə prezidenti Rəcəb Tayyib Ərdoğan Ankarada Mark Rutte ilə görüşündə ölkənin müdafiə sənayesinin gücləndirilməsi və NATO üzvləri ilə əməkdaşlığın genişləndirilməsinin vacibliyini vurğulayıb. Türkiyə Prezident Administrasiyasının məlumatına görə, görüşdə NATO liderlər zirvəsinin hazırlıqları, alyansın gündəliyi və regional, qlobal məsələlər müzakirə olunub.

Ərdoğan qarşıdakı sammitdə müttəfiqlər arasında həmrəyliyin gücləndirilməsi və NATO-nun böhranlara hazırlığının artırılması ilə bağlı qərarların qəbul olunacağına ümid etdiyini bildirib. O, transatlantik bağların qorunmasının vacibliyini vurğulayaraq, Avropa sütununun daha fəal rol oynamasına çağırıb və Türkiyənin İranla gərginliyin başlanmasından bəri sülh və diplomatiya xəttini izlədiyini qeyd edib.