İranın rabitə naziri Səttar Haşimi “sinifli internet” mövzusunu qəti şəkildə rədd edərək bildirib ki, keyfiyyətli və bərabər internetə çıxış bütün vətəndaşların haqqıdır və hökumət bu istiqamətdə addımlar atır.

ArazNews-un məlumatına görə, Haşimi Məsud Pezeşkianın Rabitə Nazirliyinə səfəri zamanı deyib: “Sinifli və ya ‘white list’ internet ümumiyyətlə mövcud deyil və bütün insanlar qlobal internet şəbəkəsinə uyğun keyfiyyətlə çıxış əldə etməlidir.” O əlavə edib ki, son 40 günlük dövrdə rabitə və elektron xidmətlərin fasiləsiz davam etməsi üçün səylər göstərilib.

Nazir təhlükəsizlik məsələlərinə də toxunaraq bildirib ki, bu kimi məqamlar nəzərə alınsa belə, ədalətli internet çıxışı bütün vətəndaşlar üçün əsas prinsipdir.

Bu açıqlamalar, ölkədə 46 gündən artıq internetə çıxışın məhdudlaşdırıldığı, eyni zamanda bəzi şəxslərin və dövlətə bağlı qurumların xüsusi imkanlardan istifadə etdiyi barədə yayılan məlumatlar fonunda verilib. Bu vəziyyət “sinifli internet” və “ağ SIM kart” kimi tanınan xüsusi giriş imkanları ilə bağlı müzakirələri yenidən gündəmə gətirib.