Birləşmiş Ərəb Əmirliklərinin yüksək vəzifəli rəsmisi vurğulayıb ki, ABŞ və İran arasında əldə olunacaq hər hansı razılaşma Hörmüz boğazından sərbəst keçidi təmin etməlidir.

Araz News-un məlumatına görə, Reuters-ə istinadən BƏƏ prezidentinin diplomatik müşaviri Ənvər Qərqaş bildirib ki, İranla müharibənin bitməsi üçün hər hansı siyasi həll bu strateji keçiddə gəmiçiliyin azadlığını təmin etməlidir və bu boğaz təzyiq alətinə çevrilməməlidir.

O xəbərdarlıq edib ki, İranın nüvə proqramı, raketləri və pilotsuz aparatlarını nəzərə almayan razılaşma bölgədə daha çox qeyri-sabitliyə səbəb ola bilər.

Qərqaş həmçinin qeyd edib ki, BƏƏ bu boğazda gəmiçiliyin təhlükəsizliyini təmin etmək üçün ABŞ-ın rəhbərliyi ilə həyata keçiriləcək hər hansı beynəlxalq təşəbbüsdə iştirak etməyə hazırdır.

Bu açıqlamalar İranın körfəz ölkələrində enerji infrastrukturuna hücumlarının davam etdiyi və qlobal enerji daşınmasının ən mühüm marşrutlarından birində pozuntuların yarandığı bir vaxtda səsləndirilib.