ArazNews-un məlumatına görə, ABŞ-ın müdafiə naziri açıqlamasında bildirib ki, bu gün yenidən İran və Tehranın səması üzərində ABŞ tərəfindən “indiyədək ən böyük həcmdə hava hücumları” həyata keçiriləcək. Onun sözlərinə görə, uçuşların və bombardman dalğalarının sayı “indiyədək ən yüksək səviyyəyə” çatıb və artmaqda davam edir.

Nazir qeyd edib ki, ABŞ-ın iradəsi “sarsılmazdır” və ölkənin hərbi imkanları genişlənməkdə davam edir. O bildirib: “Biz yüksəlirik, onlar isə düşür.”

ABŞ rəsmisi həmçinin vurğulayıb ki, bu müharibənin tempi və gedişi birbaşa Donald Tramp tərəfindən müəyyən edilir. Onun sözlərinə görə, münaqişənin başlanğıcından etibarən “Prezident Tramp kartları əlində saxlayır” və müharibənin sürətini, ritmini və vaxtını məhz o müəyyən edir.

Müdafiə naziri əlavə edib ki, ABŞ ordusu bu əməliyyatlarda süni intellekt, kiber texnologiyalar, kosmik sistemlər, elektron müharibə vasitələri və anti-dron sistemləri də daxil olmaqla bütün imkanlardan istifadə edir. Onun sözlərinə görə, bu vasitələr düşməni “kor etmək, çaşdırmaq və aldatmaq” üçün tətbiq olunur.