Azərbaycan Milli Müqavimət Təşkilatı (Dirəniş) sözçüsü Məcid Cavadı (Araz) X sosial şəbəkəsində yayımladığı mesajda İran həbsxanalarında saxlanılan azərbaycanlı siyasi fəalların vəziyyətinin qeyri-müəyyən və narahatlıq doğurduğunu bildirib.

ArazNews-un məlumatına görə, Cavadı regiondakı gərgin və “müharibə şəraitinə bənzər” vəziyyətə diqqət çəkərək siyasi məhbusların vəziyyəti barədə şəffaf məlumat verilmədiyini tənqid edib. O bildirib ki, hətta məhbusların ailələri belə hazırda onların sağlamlığı və saxlanma şəraiti haqqında dəqiq məlumat ala bilmirlər.

Cavadı mesajında bir neçə tanınmış fəalın adını çəkərək deyib: “Əzimi Qədim, Yuruş Mehrəlibəyli, Əli Babayi və onlarla digər siyasi məhbusumuz bu çətin şəraitdə rejimin həbsxanalarında saxlanılır.”

“Dirəniş” sözçüsü vurğulayıb ki, bu şəxslər “türk millətinin və Azərbaycan xalqının hüquqları” uğrunda fəaliyyət göstərdiklərinə görə cəza çəkirlər. O, onları Azərbaycan türk cəmiyyətinin “dəyərləri” adlandıraraq ictimaiyyəti və vətəndaş fəallarını bu həssas mərhələdə siyasi məhbusların səsi olmağa və onlara dəstək verməyə çağırıb.