Traxtor Azərbaycan klubu İran Futbol Federasiyasını FIFA-ya rəsmi məktubla şikayət edib. Klub rəhbərliyinin imzası və sahibin koordinasiyası ilə göndərilən məktubda məqsədin İran futbolunu zəiflətmək deyil, rəqabət ədalətini qorumaq və ayrı-seçkiliklə mübarizə olduğu vurğulanıb.

Araz News-un məlumatına görə, şikayət üç əsas istiqamət üzrə təqdim olunub və klub FIFA-dan İran futbolunda intizam və idarəetmə proseslərinin müstəqil araşdırılmasını istəyib.

Birinci istiqamətdə klub Shams Azar Qəzvinə qarşı kubok oyununun təxirə salınması tələbinin rədd edilməsini qeyd edib və komandanın xarici üzvləri üçün təhlükəsizlik tövsiyələrinə baxmayaraq fors-major vəziyyətin nəzərə alınmadığını bildirib. İkinci istiqamətdə oyunlar zamanı etnik və irqçi şüarların davam etməsinə baxmayaraq, yetərli tədbirlərin görülmədiyi iddia olunub.

Üçüncü istiqamətdə VAR protokolunun tam tətbiq edilməməsi, hakim təyinatları və qərarların şəffaflığı ilə bağlı narahatlıqlar qeyd olunub. Beş səhifəlik məktubun sənəd və görüntülərlə birlikdə FIFA-ya təqdim edildiyi və prosesin son nəticəyə qədər izlənəcəyi bildirilib.