Birləşmiş Ştatların Prezidenti Donald Tramp Ağ Evdə Benyamin Netanyahu ilə görüşdən sonra bəyan edib ki, İranla razılaşmanın mümkün olub-olmadığını müəyyən etmək üçün danışıqlar davam etdiriləcək. O, bu görüşü "çox yaxşı" kimi qiymətləndirib və ABŞ ilə İsrail arasındakı yaxın münasibətlərin davamlılığından bəhs edib.

Tramp "Truth" sosial şəbəkəsindəki mesajında Netanyahu ilə danışıqlarında hələ qəti nəticə əldə olunmadığını və yalnız İran ilə ABŞ arasında danışıqların davam etdirilməsi barədə qərar verildiyini vurğulayıb. O əlavə edib ki, əgər razılaşma əldə etmək mümkün olsa, bu varianta üstünlük veriləcək, lakin razılaşma olmasa, "nəticənin nə olacağını görməli olacağıq".

ABŞ Prezidenti həmçinin keçmiş təcrübəyə işarə edərək deyib ki, İran əvvəlki dövrdə razılaşmamaq qərarı verib və onun sözlərinə görə, "onlar üçün yaxşı olmayan" nəticələrlə üzləşiblər. Tramp mesajının davamında ümid etdiyini bildirib ki, Tehran bu dəfə "daha ağlabatan və məsuliyyətli" davranacaq.