İslam Respublikası Xarici İşlər Nazirliyinin sözçüsü regiondakı son diplomatik hərəkətliliyə toxunaraq bildirib ki, İran Türkiyə, Azərbaycan və digər qonşu ölkələrin gərginliyin azaldılmasına kömək edən rollarını yüksək qiymətləndirir və ABŞ ilə Omandan kənarda danışıqların keçirilməsi üçün heç bir planın olmadığını vurğulayıb.

Araz News-un rəsmi İRNA agentliyinə istinadən verdiyi məlumata görə, İsmayıl Bəqayi bugünkü mətbuat konfransında Tehranın Türkiyə də daxil olmaqla region ölkələrinin xoş məramını və diplomatik səylərini təqdir etdiyini deyib. O əlavə edib ki, İran əvvəldən diqqətini nüvə məsələsinə yönəldib və bu səbəbdən danışıqlar məkanı kimi Məsqət seçilib. Bəqayi bəzi region ölkələrinin danışıqların keçirildiyi məkandan narazı olması barədə iddiaların real əsasının olmadığını və İranın qonşuları ilə davamlı təmasda və məsləhətləşmədə olduğunu vurğulayıb.

Bəqayi İran rəsmilərinin region ölkələri ilə son təmaslarına və görüşlərinə toxunaraq bildirib ki, İslam Respublikası qonşu ölkələrin diplomatik proseslərin formalaşmasında və regional gərginliyin azaldılmasında konstruktiv rol oynaya biləcəyinə inanır.

Xarici İşlər Nazirliyinin sözçüsü həmçinin İranın müdafiə nazirinin Azərbaycan Respublikasına səfəri barədə danışarkən, bu səfərin ikitərəfli etimadın möhkəmləndirilməsi məqsədi daşıdığını və Tehranın Cənubi Qafqazı öz təhlükəsizlik və sabitliyinin bir hissəsi hesab etdiyini deyib. Onun sözlərinə görə, azərbaycanlı rəsmilərlə aparılan danışıqlar geniş spektrli təhlükəsizlik və siyasi məsələləri əhatə edib və bu məsləhətləşmələrin davam etdirilməsi planlaşdırılır.

Bəqayi çıxışının digər hissəsində ABŞ-ın təzyiqlərinə və İsrailin regional gərginliyi artırmaqdakı roluna işarə edərək deyib ki, İranın danışıqlar tərəfi ABŞ-dır və Vaşinqton kənar təzyiqlərdən asılı olmayaraq qərar verməlidir. O vurğulayıb ki, İran diplomatiya yolunu izləməklə yanaşı, hər hansı hərbi təcavüzə qətiyyətli və peşmanedici cavab verəcək.