آراز نیوز

ارگان خبری تشکیلات مقاومت ملی آزربایجان

دیرنیش
چهارشنبه ۹ام مهر ۱۳۹۹
آخرین عناوین
شما اینجا هستید: / خبر / آزربایجان / ایرانین سون اولایلاری – لطیف حسنی

رجائی شهر زندانیندان یاییلان مکتوب

ایرانین سون اولایلاری – لطیف حسنی

یالانچیلیق و فیریلداقچیلیقلا «سازندگی»، «اصلاحات»، «مهرورزی» و «تدبیر له اومود» اؤرتویو آلتیندا اؤلکه خالقلارینی قوندارما سئچکی صاندیقلارینا سوروکله‌مه‌یی باجاریب اؤزلرینه مشروعییت قازاندیراراق اؤلکه‌نین بوتون یئرآلتی-یئراوستو ثروت‌لرینی چاپیپ تالادیلار.

ایرانین سون اولایلاری – لطیف حسنی
12 دسامبر 2019 - 01:16
کد خبر: ۵۳۲۰۹
تحریریه آرازنیوز

دئموکراتیک، آچیق حاکمیت سیستم‌لرینی، غیر دئموکراتیک قاپالی سیستم‌لردن بلیرله‌دن اؤلچو، مخالیف پارتیالاری دؤزوب اونلارلا قاتلاشماقدادیر. بونونلادا، بو گونکو دونیامیزدا دئموکراتیک قورلوشلارین قورولماسی اوچون چئشیتلی دوشونجه‌لری و سلیقه‌لری اؤزونده داشییان چوخ سایلی پارتیا و ان‌جی‌او لارین وارلیغینی قبول ائتمک ان بؤیوک اوستونلوک ساییلیر.

بو اولدوغو حالدا دئموکراسیانین باشقا قوراللاری او جومله‌دن؛ سیاسی یاریشمالار و آزاد سئچکی‌لر گئرچک‌لشیب، میللت سئچکین‌لرینین چاباسی‌ایله سوروملو، آیدین، بیر-بیریندن باغیمسیز محکمه، اجرا ائدیجی و قانون وئریجی قووه‌لره دایاناراق بیر دئموکراتیک قورولوش اورتایا چیخیر. بونلارلا یاناشی اؤلکه‌ده سوسیال و کیشی‌سل آزادلیقلاری، سؤز و ویجدان آزادلیغینی قورویان؛ جنسی، عیرقی و دینی آیری سئچکیلیک‌لره یول وئریلمه‌مه‌سی اوچون چوخ سایلی ان‌جی‌او، مطبوعات و مئدیا اورقانلاری آرا وئرمه‌دن چالیشیاراق حاکمیت قووه‌لرینین بوتون ساحه‌لرده اولان فعالییت‌لرینی گؤز آلتینا آلیرلار. محض بئله بیر توپلومدا سیستماتیک شکیلده اختلاس، اؤز‌باشینالیق و جنایت‌دن آرتیق سؤز گئده بیلمز.

۱۳۵۷-ینجی ایلدن بری سؤزده بوتون یوخسوللاری و مظلوملاری عدالت بایراغی آلتینا آلیب قورویان اسلامی جمهوری رژیمی، ائله ایلک یاراندیغی گوندن بیر یاندان اؤلکه اهالیسی‌نین یاریسیندان چوخونو قارا چادرایا چولغالاییب ان گئری قانونلارینا دایاناراق قادینلاری شددتلی درجه‌ده آیری سئچکیلییه معروض قویوب ایلکین حقوقلاریندان محروم ائتدیلر، باشقا یاندان ایسه قیسا مدت‌ده آچیق شکیلده فعالیتده بوتون پارتیالاری سیل-سوپور و دیدرگین ائتدیکدن سونرا دئوریم شرایطینده یارانان سؤز آزادلیغینا سون قویدولار. یالانچیلیق و فیریلداقچیلیقلا «سازندگی»، «اصلاحات»، «مهرورزی» و «تدبیر له اومود» اؤرتویو آلتیندا اؤلکه خالقلارینی قوندارما سئچکی صاندیقلارینا سوروکله‌مه‌یی باجاریب اؤزلرینه مشروعییت قازاندیراراق اؤلکه‌نین بوتون یئرآلتی-یئراوستو ثروت‌لرینی چاپیپ تالادیلار و پهلوی رژیمیندن قات-قات آرتیق گونو-گوندن یوخسوللاشان خالقی سیخما- بوغمایا سالیب، اونلارین اؤزه‌ل یاشایشلارینا بئله بورون سوخدولار. بو آزمیش دئیه میللی ثروت‌لردن الده اولونان گلیرلرین واسیطه‌سی‌ایله قونشو اؤلکه‌لرده تروریست قوروپلار یاراداراق اونلاری قودوردوب خالقلاری‌نین جانینا داراشدیریبلار.

بیر حالداکی، دونیامیزدا میللت‌لر قیمت‌لرین بیر نئچه قیران باهالاشماغیندان اؤترو آردیجیل اولاراق اعتراض نمایشلری یولا سالیب دئولت‌لرینی استعفا ائتمه‌یه بئله مجبور ائدیرلر؛ بیزیم اؤلکه‌میزده دئولت هر بیر اعتراضی اغتشاش و اعتراضچینی ایسه اغتیشاشچی، اوباش و شرور آدلاندیراراق سوروکله‌ییب خاریجی سرویس‌لره و یا خود خاریجده‌کی اپوزیسیونلارا باغلایب محو ائدیرلر.

نئجه‌کی سون گونلرده قیمت‌لرین اوچ قات آرتیق باهالاشماغینا قارشی اولان اؤلکه خالقلارینین اعتراض سسلرینی بوغماقدان اؤترو کئچمیشلرده اولدوغو کیمی، اؤنجه اینترنتی کسیب دونیا اجتماعییتی‌نین خبرسیزلییندن ۴۸ ساعاتین ایچینده یوزلرله اعتراضچینی اؤلدوروب، مینلرجه‌سینی ایسه توتوقلاییبلار. روحانی دئولتی بو اولایلاردا تدبیرله اومودون نه اولدوغونو چوخ گوزلجه‌سینه اؤلکه خالقلارینا آنلاتدی. سن دئمه تدبیر، اهالی‌نین گله‌جک اومودو ساییلان ائولادلارینین کؤکسونده آچیلان گولله‌لریمیش! بورادا یئری گلمیش‌کن شهید اولانلارین عایله‌سینه باش ساغلیغی وئره‌رک بوتون دونیا اجتماعییتینی، دونیانین دئموکراتیک دئولت‌لرینی و بین‌الخالق اینسان حاقلاری قوروملارینی بو جنایتی کسگین شکیلده قیناماغا و اؤلکه خالقلارینی بئله بیر حاکمییت قارشیسیندا یالنیز بوراخماماغا چاغیریرام. نییه‌کی بو جنایت، اینسان حاقلارینی کوبودجاسینا پوزان بشرییته قارشی توره‌دیلن دئولتی بیر جنایت دیر.

لطیف حسنی، یئنی گاموح باشقانی، رجائی شهر تورمه‌سی، آزر آیی، ۱۳۹۸

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر