ABŞ-ın dövlət katibi Marko Rubio 2028-ci il prezident seçkilərində namizədliyini irəli sürmək üçün Donald Trampın administrasiyasından ayrıla biləcəyi barədə xəbərləri təkzib edib. O, Trampın prezidentlik müddəti başa çatanadək hökumətdə qalmaq niyyətində olduğunu bildirib.
"Reuters" agentliyinin məlumatına görə, Rubio "The New York Times" qəzetinə müsahibəsində Trampın prezidentlik müddətinin sonunadək onunla əməkdaşlığı davam etdirməyin həmişə planı olduğunu vurğulayıb.
ABŞ-ın dövlət katibi siyasi gələcəyi ilə bağlı fərziyyələrə münasibət bildirərək deyib: "Artıq 2028-ci il barədə həqiqətən danışmayacağam. Bu müzakirəyə heç bir halda qoşulmuram".
Bu açıqlama ABŞ-da növbəti prezident seçkilərində respublikaçıların mümkün namizədləri ilə bağlı fərziyyələrin davam etdiyi bir vaxtda səsləndirilib.
