Britaniya, ABŞ və Niderlandın kəşfiyyat qurumları İran rejiminə aid edilən kibercasusluq kampaniyasını aşkarlayıblar. Bu kampaniya müxtəlif ölkələrdə müxalifləri, fəalları və jurnalistləri hədəf alıb. Hücumçular zərərli proqram vasitəsilə qurbanın məkanını izləyə, ekranın şəklini çəkə, mesajlara çıxış əldə edə və cihazın mikrofonunu aktivləşdirə bilirdilər.
Sky News-un məlumatına görə, Britaniyanın Milli Kibertəhlükəsizlik Mərkəzi bildirib ki, hakerlər WhatsApp-da etibarlı şəxslərin kimliyinə bürünərək qurbanlarla ünsiyyətə girirdilər. Etimad qazandıqdan sonra qurbanı "CHOSEN BRICK" adlı zərərli proqramı quraşdırmağa təhrik edirdilər.
Hücum üsulu hər bir şəxs üçün ayrıca hazırlanırdı. Bir hadisədə hücumçular saxta MRT nəticəsi hazırlamışdılar ki, hədəfi yoluxmuş faylı açmağa vadar etsinlər.
FBI bu zərərli proqramın məsuliyyətini İran rejiminin İstixbarat Nazirliyinin üzərinə qoyub və bildirib ki, ondan məlumat toplamaq, oğurlanmış məlumatları yaymaq və şəxslərin nüfuzunu ləkələmək üçün istifadə olunub.
